مارخور پاکستان کے تحفظ ، سلامتی ،وقار، بہادری ،بلند حوصلے اور مرگ دشمن کی علامت سمجھا جاتا ہے: محترمہ فرح عظیم شاہ

کوئٹہ ( نمائندہ خصوصی) مارخور پاکستان کے تحفظ ، سلامتی ،وقار، بہادری ،بلند حوصلے اور مرگ دشمن کی علامت سمجھا جاتا ہے ، اس کے اوصاف آج پاکستانی دفاعی ، قومی سلامتی، کامیاب سفارتکارانہ پالیسیوں میں نمایاں نظر آتے ہیں، فیلڈ مارشل حافظ سید عاصم منیر کی مدبرانہ قیادت میں مارخور کے نشان کےساتھ پاکستانی مسلح افواج اور قومی سلامتی کے ادارے ملکی دفاع ناقابلِ تسخیر بنانے میں تاریخی کردار ادا کر رہے ہیں، پوری پاکستانی قوم اپنی افواج ، عسکری قیادت اور مار خور کے نشان پر فخر کرتی ہے مارخور کے عالمی دن کے موقع پر ایک بیان میں رکن بلوچستان اسمبلی محترمہ فرح عظیم شاہ نے کہا کہ پاکستان کے حساس ادارے کا نشانِ مارخور دنیا بھر میں جرات، ذہانت، چوکسی اور دشمن کے خلاف بھرپور جارہانہ کاروائیوں کی صلاحیت کا نشان سمجھا جاتا ہے محترمہ فرح عظیم شاہ نے کہا کہ پاکستانی انٹیلیجنس اداروں نے دہشت گردی کے خاتمے، قومی سلامتی کے تحفظ دشمن کی سازشیں ناکام بنانے میں بے مثال کامیابیاں حاصل کی ہیں جنہیں دنیا بھر میں قدر کی نگاہ سے دیکھا جاتا ہے۔رکن بلوچستان اسمبلی محترمہ فرح عظیم شاہ نے کہا کہ آج ضرورت اس امر کی ہے کہ ہم اپنی قومی شناخت، قدرتی ورثے اور دفاعی اداروں پر فخر کرتے ہوئے اتحاد و یکجہتی کا مظاہرہ کریں تاکہ پاکستان مزید مضبوط و مستحکم ہو سکے۔ انہوں نے کہا کہ مارخور کا عالمی دن پاکستان کے لئے باعث اطمینان و افتخار ، پاکستان کی قدرتی خوبصورتی، جرات و استقامت کی علامت ہے ، آج اقوامِ عالم میں مارخور کی بڑھتی پذیرائی پاکستان کا مثبت تشخص اجاگر کر رہی ہے۔ انہوں نے کہا کہ عالمی سطح پر مارخور کی اہمیت تسلیم کیا جانا اس امر کا ثبوت ہے کہ پاکستان قدرتی ورثے کے تحفظ کے حوالے سے اہم کردار ادا کر رہا ہے اور اقوام عالم کی بقا کا ضامن ہے۔