صدر مملکت کی کوئٹہ میں دہشت گردی کے واقعے کی مذمت، دشمن عناصر عوام کو نقصان پہنچانے کے ساتھ پاکستان کی عالمی امن کاوشوں سے توجہ ہٹانا چاہتے ہیں، آصف علی زرداری

اسلام آباد۔(نمائندہ خصوصی):صدرِ مملکت آصف علی زرداری نے کوئٹہ میں دہشت گردی کے واقعے کی شدید مذمت کرتے ہوئے کہا ہے کہ دشمن عناصر پاکستان کے عوام کو نقصان پہنچانے کے ساتھ پاکستان کی عالمی امن کاوشوں سے توجہ ہٹانا چاہتے ہیں۔اتوار کو ایوان صدر کے پریس ونگ سے جاری بیان میں صدر مملکت آصف علی زرداری نے کہا کہ دنیا دہشت گردوں اور ان کے سرپرستوں کا اصل چہرہ دیکھے کہ وہ کس طرح پاکستان کی عالمی امن کی کوششوں کو متاثر کرنے کی ناکام کوشش کر رہے ہیں۔ انہوں نے کہا کہ کسی کو شک نہیں ہونا چاہئے کہ پاکستان دہشت گردوں، ان کے سہولت کاروں، مالی معاونت کرنے والوں اور محفوظ پناہ گاہیں فراہم کرنے والوں کو شکست دے گا۔ صدر آصف علی زرداری نے کہا کہ امن، استحکام اور قومی سلامتی کے خلاف ہر سازش کو ناکام بنائیں گے اور دہشت گردوں اور ان کے سرپرستوں کو نہ بھولیں گے اور نہ معاف کریں گے۔صدرِ مملکت نے کہا کہ شہداء کا خون رائیگاں نہیں جائے گا، شہداء کے خون کے ہر قطرے کا حساب لیا جائے گا۔