صدر مملکت آصف علی زرداری کا بنوں میں پولیس سٹیشن پر فتنہ الخوارج کے دہشت گردانہ حملے میں شہید ہونے والے پولیس اہلکاروں کو خراج عقیدت

اسلام آباد(نمائندہ خصوصی):صدر مملکت آصف علی زرداری نے بنوں میں پولیس سٹیشن فتح خیل پر فتنہ الخوارج کے دہشت گردانہ حملے کے نتیجے میں شہید ہونے والے پولیس کے عملے کو خراج عقیدت پیش کیا ہے۔اتوار کو ایوان صدر کے پریس ونگ سے جاری بیان میں صدر مملکت نے شہداء کی مغفرت اور درجات کی بلندی کی دعا کی۔صدر مملکت نے واقعے میں مقامی افراد کے گھروں کو پہنچنے والے نقصان پر اظہار افسوس کرتے ہوئے صوبائی اور وفاقی حکومت کو ہدایت کی کہ زخمیوں اور متاثرین کی ہرممکن مدد کی جائے۔صدر مملکت آصف علی زرداری نے کہا کہ دہشت گرد عناصر کے ناپاک عزائم ناکام بنائے جائیں گے، قوم اپنی فورسز کے شانہ بشانہ کھڑی ہے۔انہوں نے کہا کہ ایسے وقت جب پاکستان علاقائی اور عالمی امن کیلئے کوشاں ہے، بھارتی پشت پناہی پر پلنے والے دہشت گرد طالبان رجیم کی فراہم کردہ پناہ گاہوں سے پاکستان کی شہری آبادی اور قانون نافذ کرنے والے اداروں کو نشانہ بنا رہے ہیں۔ صدر آصف علی زرداری نے کہا کہ پاکستان عالمی امن کی کوششوں میں بھی کامیاب ہوگا اور ہم دہشت گردوں اور ان کے سرپرستوں کو بھی شکست دیں گے۔صدر مملکت نے کہا کہ ہم صرف دہشت گردوں کو نہیں بلکہ ان کے سہولت کاروں اور سرپرستوں کو بھی نشانہ بنائیں گے۔