اسلام آباد۔( نمائندہ خصوصی)سویڈن نے سویڈش انٹرنیشنل ڈویلپمنٹ کو آپریشن ایجنسی (سیڈا) کے ذریعے 2026 کے انسانی ہمدردی کی کارروائی برائے چلڈرن اپیل کے تحت یونیسیف کو 4.17 ملین امریکی ڈالر کا عطیہ دیا ہے۔ یہ بروقت تعاون یونیسیف کو اس قابل بنائے گا کہ وہ پاکستان بھر میں موسمیاتی و دیگر ہنگامی صورتحال کا فوری جواب دے سکے۔ جمعرات کو یونیسیف سے جاری پریس ریلیز کے مطابق یونیسیف کی پاکستان میں نمائندہ پرنیل آرنسیڈ نے کہا کہ پاکستان کے تناظر میں لچکدار فنڈنگ بہت اہم ہے، جہاں بچوں کو موسمیاتی تغیرات، نقل مکانی اور غذائی قلت کے 
باعث لاتعداد خطرات کا سامنا ہے، ہم اس اہم مدد اور بچوں اور ان کے خاندانوں کی فلاح و بہبود کے لیے غیر متزلزل عزم رکھنے والے اپنے شراکتدار سویڈن کے شکرگزار ہیں، ہم مل کر سب سے زیادہ کمزور افراد تک پہنچ رہے ہیں۔ سویڈن کی مدد کی بدولت 2025 میں یونیسیف پورے خیبر پختونخوا اور پنجاب میں سیلاب کی ہنگامی صورتحال کا جواب دینے میں کامیاب رہا، بلوچستان اور سندھ میں متاثرہ کمیونٹیز تک پہنچا۔ 4 لاکھ سے زیادہ لوگوں نے ضروری غذائیت، بچوں کے تحفظ، تعلیم، صحت اور صفائی ستھرائی کی خدمات حاصل کیں جبکہ ذہنی صحت اور نفسیاتی مدد تقریباً 25,000 بچوں اور دیکھ بھال کرنے والوں تک کمیونٹی پر مبنی مداخلتوں کے ذریعے پہنچی۔پاکستان میں سویڈن کی سفیر الیگزینڈرا برگ وون لنڈے نے کہا کہ سویڈن کی انسانی امداد کی بنیاد لوگوں پر یقین، ان کی صلاحیت، ان کی لچک اور ان کا اپنا مستقبل بنانے کا حق ہے، ہمیں پاکستان میں یونیسیف کے کام میں مدد کرنے پر فخر ہے۔ سویڈن کی 
طرف سے مسلسل تعاون صحت، غذائیت، پانی، صفائی اور حفظان صحت اور بچوں کے تحفظ میں مربوط خدمات کو مضبوط بنانے کے ساتھ ساتھ بچوں کی بقاء و تندرستی کو بہتر بنانے میں اپنا کردار ادا کرتے ہوئے شدید غذائی قلت کا شکار بچوں کے علاج تک رسائی کو برقرار رکھنے اور بڑھانے میں مدد کرے گا۔ بیان میں مزید کہا گیا ہے کہ یونیسیف پاکستان بھر میں جان بچانے والی امداد میں اہم خلا کو دور کرتا رہے گا جس میں سب سے زیادہ کمزور اور پسماندہ بچوں اور ہنگامی حالات سے متاثر ہونے والے خاندانوں پر توجہ دی جائے گی۔ سویڈن جیسےشراکت داروں کے تعاون سے یونیسیف ان لوگوں کو بروقت جان بچانے والی امداد پہنچا سکتا ہے جنہیں اس کی سب سے زیادہ ضرورت ہے۔
سویڈن کا بچوں کے لیے یونیسیف کے زندگی بچانے کے کام میں مدد کے لیے 4.17 ملین امریکی ڈالر کا عطیہ
