کراچی۔ ( نمائندہ خصوصی)کاروانِ اقبال اور کراچی پریس کلب کے اشتراک سے یومِ اقبال کے موقع پر کراچی پریس کلب میں ایک سیمینار منعقد ہوا، جس سے پروفیسر ڈاکٹر معین الدین عقیل، فصیح اللہ حسینی، قاضی محمد شعیب، فاروق سمیع اور ڈاکٹر ظفر اقبال نے “اقبال اور عصرِ حاضر” کے موضوع پر خطاب کیا۔ رانا آصف صاحب نے نظامت کے فرائض انجام دیے۔ کانفرنس میں کاروانِ اقبال کی ہیئتِ نو اور نوجوانوں کی شمولیت کے حوالے سے ایک اسٹیئرنگ کمیٹی تشکیل دی گئی اور نومبر میں ایک بڑے پیمانے پر پیغامِ اقبال کے فروغ اور عملی میدان میں کوشاں افراد اور اداروں کی پارٹنرشپ کے ساتھ اقبال کانفرنس کا اعلان کیا گیا۔ اس کے لیے ایک کور کمیٹی بھی تشکیل دی گئی۔ پروگرام میں ڈاکٹر اورنگ زیب رہبر، اشعر خان اور عبدالرحیم متقی نے کلامِ اقبال پڑھا۔ بڑی تعداد میں حاضرین نے پروگرام میں شرکت کی 
اور پروگرام کے انعقاد کو سراہا۔ مقررین نے اس امر پر زور دیا کہ علامہ اقبال کے افکار آج بھی نئی نسل کی فکری رہنمائی، قومی بیداری اور خود اعتمادی کے لیے نہایت اہم ہیں۔ سیمینار کے مہمانِ خصوصی ممتاز محقق و دانشور ڈاکٹر معین الدین عقیل تھے۔انہوں نے اپنے خطاب میں کہا کہ اقبال کے حوالے سے سیمینارز اور تقاریب کا انعقاد خوش آئند ہے، تاہم اصل ضرورت یہ ہے کہ اقبال کی فکر کو عملی طور پر نئی نسل تک پہنچایا جائے۔ انہوں نے کہا کہ نوجوانوں کو ایسی تقریبات میں شریک دیکھ کر امید پیدا ہوتی ہے کہ اقبال کا پیغام زندہ ہے۔ انہوں نے مزید کہا کہ فکرِ اقبال کو عام کرنے کا سب سے موثر ذریعہ تعلیم ہے؛ تعلیم کے ذریعے فکرِ اقبال کو ہم جہاں تک چاہیں پہنچا سکتے ہیںہے۔ڈاکٹر معین الدین عقیل نے کہا کہ اگر بچوں اور نوجوانوں کو فکرِ اقبال سے شناسا کرنا ہے تو ان کو اقبال کے مقاصد، تصورِ خودی اور پیغامِ عمل سے روشناس کرایا جائے، اس سے معاشرے میں مثبت تبدیلی لائی جا سکتی ہے۔تقریب کے دوران ڈاکٹر اورنگزیب، اشعر خان اور عبدالرحیم متقی نے کلامِ اقبال پیش کیا، جسے شرکا نے بے حد سراہا اور بھرپور داد دی۔ اختتام پر ڈاکٹر معین الدین عقیل، پروفیسر یاسمین فاروقی، قاضی شعیب، چیئرمین گلشن اقبال ٹاؤن ڈاکٹر فواد احمد، صیح اللہ حسینی، پیما کے رہنما اور ممتاز سرجن ڈاکٹر اورنگزیب رہبر، اشعر خان، بہار آباد سوسٹی کے صدر عمران سید علی او ر طالب علم رہنما عبدالرحیم متقی کو کراچی پریس کلب کی جانب سے یادگاری شیلڈز پیش کی گئیں۔
