وفاقی وزیر داخلہ محسن نقوی کاشاعر مشرق علامہ محمد اقبال کو شاندار الفاظ میں خراج عقیدت

اسلام آباد( نمائندہ خصوصی)وفاقی وزیر داخلہ محسن نقوی نے شاعر مشرق علامہ محمد اقبال کو ان کے یوم وفات پر شاندار الفاظ میں خراج عقیدت پیش کرتے ہوئے کہا ہے کہ علامہ اقبال نے امت مسلمہ کو خودی، بیداری اور عمل کا پیغام دیا اور آج بھی اسی پیغام کو اپنانے کی اشد ضرورت ہے۔اقبال کی فکر کا بنیادی نکتہ امت مسلمہ کا اتحاد تھا، وہ مسلمانوں کو رنگ، نسل اور زبان سے بالاتر دیکھنا چاہتے تھے۔اقبال کے نزدیک مسلمان ایک جسم کی مانند ہیں، جن کی طاقت ان کے باہمی اتحاد، اخوت اور مشترکہ مقصد میں پوشیدہ ہے۔ علامہ اقبال نے مسلمانوں کو احساس دلایا کہ غلامی تقدیر نہیں بلکہ کمزوری ہے، جسے خودی اور عمل سے بدلا جا سکتا ہے۔ وزیر داخلہ محسن نقوی نے کہا کہ خطبہ الہ آباد میں اقبال نے برصغیر کے مسلمانوں کے لیے ایک الگ ریاست کا تصور پیش کیا جو بعد میں حقیقت بنا۔اقبال نے نوجوانوں کو شاہین قرار دے کر انہیں بلند پروازی،خودی اور مسلسل جدوجہد کا درس دیا۔علامہ اقبال کے نزدیک نوجوان ہی قوم کا اصل سرمایہ ہیں، جو اپنی صلاحیتوں سے تاریخ کا رخ بدلنے کی طاقت رکھتے ہیں۔اقبال کی شاعری محض الفاظ نہیں بلکہ ایک انقلابی پیغام ہے جو امت مسلمہ کو جھنجھوڑنے اور جگانے کا ذریعہ بنی۔ آج کے دور میں جب مسلمان تفرقے اور باہمی انتشار کا شکار ہیں۔ ان حالات میں اقبال کا پیغام اتحاد اور خودی غیر معمولی اہمیت اختیار کرچکا ہے۔ ہمیں اپنی انفرادی اور اجتماعی زندگیوں کو علامہ اقبال کی فکری تربیت کی روشنی میں استوار کرنے کی ضرورت ہے۔ علامہ اقبال کے نظریات کی روشنی میں امن، مساوات اور اتحاد کی بنیادوں پر قائم پاکستان ہی ہمارا مستقبل ہے۔آج ہم سب کو اقبال کے پیغام کو عام کرنے اور اس پر عمل پیرا ہونے کی ضرورت ہے۔ آئیے عہد کریں کہ اقبال کے افکار کو اپنی قومی پالیسی، ترجیحات اور اجتماعی طرز فکر کا حصہ بنائیں گے۔