گورنر خیبرپختونخوا فیصل کریم کنڈی سے چیئرپرسن پیمرا عنبرین جان کی ملاقات ، باہمی دلچسپی کے امور، میڈیا کے کردار اور ملکی صورتحال پر تبادلہ خیال

اسلام آباد۔( نمائندہ خصوصی):گورنر خیبرپختونخوا فیصل کریم کنڈی سے چیئرپرسن پیمرا عنبرین جان نے گورنر ہاؤس اسلام آباد میں ملاقات کی اورباہمی دلچسپی کے امور، میڈیا کے کردار اور موجودہ ملکی صورتحال پر تفصیلی تبادلہ خیال کیا گیا۔ گورنر آفس کی جانب سے جاری بیان کے مطابق گورنر خیبرپختونخوا نے پیمرا کے کردار کو سراہتے ہوئے ادارے کی کارکردگی پر خراجِ تحسین پیش کرتے ہوئے کہا کہ موجودہ حالات کے تناظر میں پیمرا کی ذمہ داریاں مزید بڑھ گئی ہیں اور ذمہ دارانہ صحافت کے فروغ کے لئے ادارے کا فعال کردار انتہائی اہم ہے۔انہوں نے کہا کہ میڈیا کو درست اور بروقت معلومات کی فراہمی یقینی بنا کر معاشرے کی مثبت رہنمائی کرنی چاہئے۔ ملاقات میں 2008 میں ڈیرہ اسماعیل خان میں قائم ہونے والے پیمرا دفتر کی جلد بحالی پر بھی بات چیت کی گئی جس پر دونوں جانب سے اتفاق کیا گیا کہ اس اقدام سے مقامی سطح پر میڈیا ریگولیشن اور سہولیات میں بہتری آئے گی۔چیئرپرسن پیمرا عنبرین جان نے اس موقع پر پیمرا کی جانب سے جاری اقدامات سے آگاہ کیا جس پر گورنر نے امید ظاہر کی کہ عنبرین جان کی قیادت میں ادارہ مزید بہتر کارکردگی کا مظاہرہ کرے گا۔