خواتین کو بااختیار بنانا پاکستان کی پائیدار ترقی کی کنجی ہے، روبینہ خالد

اسلام آباد( نمائندہ خصوصی):بینظیر انکم سپورٹ پروگرام (بی آئی ایس پی) کی چیئرپرسن سینیٹر روبینہ خالد نے عالمی یومِ خواتین کے موقع پر دنیا بھر کی خواتین کی ثابت قدمی،جرات اور خدمات کو خراجِ تحسین پیش کرتے ہوئے کہا ہے کہ تنازعات، بحرانوں اور مشکلات کے دوران خواتین کلیدی کردار ادا کرتی ہیں۔اتوار کواپنے پیغام میں انہوں نے کہا کہ خواتین متعدد سماجی اور معاشی چیلنجز کا سامنا کرنے کے باوجود خاندانوں، معاشروں اور معیشت کو مضبوط بنانے میں اہم کردار ادا کر رہی ہیں۔سینیٹر روبینہ خالد نے کہا کہ شہید محترمہ بینظیر بھٹو نے پاکستان میں خواتین کی قیادت اور بااختیار بنانے کی بنیاد رکھی اور ایسے معاشرے کا تصور پیش کیا جہاں خواتین قومی دھارے میں مکمل طور پر شامل ہوں۔بینظیر انکم سپورٹ پروگرام کے کردار کو اجاگر کرتے ہوئے انہوں نے کہا کہ بی آئی ایس پی ملک کا سب سے بڑاسماجی تحفظ کا پروگرام بن چکا ہے جو پاکستان بھر میں لاکھوں خواتین کو مالی معاونت، وقار اور معاشی تحفظ فراہم کر رہا ہے۔انہوں نے کہا کہ بی آئی ایس پی میں رجسٹرڈ خواتین کو اپنے گھروں کی سربراہ کے طور پر تسلیم کیا گیا ہےجو ان کی مالی خودمختاری اور خاندانی فیصلوں میں کردار کو مضبوط بنانے کی جانب ایک اہم قدم ہے۔روبینہ خالد نے کہا کہ صدر مملکت آصف علی زرداری اور چیئرمین پاکستان پیپلز پارٹی بلاول بھٹو زرداری شہید بینظیر بھٹو کے وژن کو آگے بڑھاتے ہوئے ملک میں خواتین کے حقوق کے تحفظ اور فروغ کے لیے کوششیں جاری رکھے ہوئے ہیں۔انہوں نے زور دیا کہ پاکستان کی ترقی اور پائیدار معاشی استحکام کا خواتین کو بااختیار بنانے سے گہرا تعلق ہے۔انہوں نے کہا کہ اگرچہ خواتین ملک کی آبادی کا تقریباً نصف حصہ ہیں، تاہم معاشی سرگرمیوں میں ان کی شمولیت نسبتاً کم ہے۔انہوں نے کہا کہ خواتین کو تعلیم، مہارتوں اور معاشی مواقع فراہم کرنا نہایت ضروری ہے تاکہ وہ قومی ترقی میں مؤثر کردار ادا کر سکیں۔بی آئی ایس پی کی چیئرپرسن نے کہا کہ یہ پروگرام خواتین کے لیے سماجی بہبود اور تحفظ کا ایک مضبوط ستون بن چکا ہے جو لاکھوں خواتین کو زیادہ مالی استحکام اور باوقار زندگی حاصل کرنے میں مدد دے رہا ہے۔سینیٹر روبینہ خالد نے امتیازی سلوک کے خاتمے، مساوی مواقع کی فراہمی اور خواتین کے لیے زیادہ جامع اور منصفانہ معاشرے کی تعمیر کے عزم کی تجدید پر زور دیا۔