وزیراعلیٰ مریم نواز شریف کا رمضان میں صوبہ بھر میں سیکیورٹی کے اقدامات کو مزید سخت کرنے کی ہدایت

لاہور ( نمائندہ خصوصی) وزیراعلیٰ پنجاب مریم نواز شریف نے رمضان المبارک میں صوبہ بھر میں سیکیورٹی کے اقدامات کو مزید سخت کرنے کی ہدایت کی ہے۔ وزیراعلیٰ مریم نواز شریف نے مساجد،امام بارگاہوں،عبادت گاہوں، بازاروں، مارکیٹوں اور عوامی مقامات پر اضافی اہلکار تعینات کرنے کا حکم دیا، سی سی ٹی وی کیمروں، واک تھرو گیٹس اور سرچ لائٹس کی تنصیب کرنے اور فول پروف سکیورٹی کویقینی بنانے کی بھی ہدایت کی ہے۔ وزیراعلیٰ مریم نواز شریف نے عبادت گاہوں کے گردونواح میں پولیس گشت، سنیپ چیکنگ اور سرچ آپریشنز میں تیزی لانے کی ہدایت کی اور حساس مقامات پر نمازِ جمعہ اور تراویح کے اجتماعات کے لیے بیرئیرز اور خاردار تاروں کیساتھ تین لیئرز سیکیورٹی پلان ترتیب دینے کا حکم بھی دیاہے۔ وزیراعلیٰ مریم نواز شریف نے کہا کہ رمضان المبارک میں عوام کی جان و مال کی حفاظت کو ہر حال میں یقینی بنایا جائے گا۔