لاہور۔(اسپورٹس رپورٹر):پاکستان کرکٹ بورڈ (پی سی بی) کے چیئرمین محسن نقوی نے پاکستان سپر لیگ (پی ایس ایل) کی ٹیم کی ریکارڈ نیلامی پر قوم کو مبارکباد دی ہے۔محسن نقوی نے کہا کہ آج کا دن پاکستان، پاکستان کرکٹ، پی سی بی اور پی ایس 
ایل کے لیے فخر اور شکر کا لمحہ ہے۔ انہوں نے کہا کہ 10برس قبل شروع ہونے والا سفر آج ایک اور سنگ میل عبور کر گیا ہے۔انہوں نے بتایا کہ ٹیم کی نیلامی 245کروڑ روپے میں ہوئی اور اس کامیابی پر وہ اللہ تعالی کے حضور سر بسجود ہیں۔چیئرمین پی سی بی نے کہا کہ یہ کامیابی پاکستان کے بین الاقوامی برانڈ پی ایس ایل پر سرمایہ کاروں کے بے پناہ اعتماد کا مظہر ہے۔ انہوں نے مزید کہا کہ آج پرامن اور کرکٹ سے محبت کرنے والے پاکستان کی فتح ہوئی ہے۔محسن نقوی نے ٹیم کی نیلامی جیتنے والی فرنچائز ولی ٹیکنالوجیز کو بھی مبارکباد دی اور کہا کہ پی ایس ایل آج دنیائے کرکٹ کے افق پر ایک چمکتا ہوا ستارہ بن چکا ہے۔
