مظفرگڑھ میں دھی رانی پروگرام کے تحت 207 اجتماعی شادیاں، صوبائی وزیر سہیل شوکت بٹ کی شرکت

لاہور (نمائندہ خصوصی) مظفرگڑھ کے اسپورٹس گراؤنڈ میں دھی رانی پروگرام کے چوتھے مرحلے کے تحت 207 اجتماعی شادیوں کی ایک پروقار تقریب منعقد ہوئی جس میں3 غیر مسلم مستحق جوڑے اور 4 معذور جوڑے بھی شامل تھے۔ تقریب میں صوبائی وزیر سماجی بہبود سہیل شوکت بٹ نے بطور مہمانِ خصوصی شرکت کی اور وزیرِ اعلیٰ پنجاب مریم نواز شریف کی عوامی فلاح اور دوراندیش قیادت کی بھرپور تعریف کی۔ اس موقع پر رکنِ صوبائی اسمبلی اجمل چانڈیا، ایم پی اے عون حمید ڈوگر، ڈی جی سوشل ویلفیئر طارق قریشی، ڈپٹی ڈائریکٹر سوشل ویلفیئر اظہر یوسف، ڈپٹی کمشنر عثمان طاہر جپہ اور ڈسٹرکٹ پولیس آفیسر سید غضنفر علی شاہ بھی موجود تھے۔ رکنِ صوبائی اسمبلی اجمل چانڈیا نے اپنے خطاب میں اجتماعی شادیوں اور دھی رانی پروگرام کے اقدامات کو سراہتے ہوئے وزیرِ اعلیٰ پنجاب کی عوامی سوچ اور فلاحی اقدامات کو زبردست خراجِ تحسین پیش کیا۔صوبائی وزیر سہیل شوکت بٹ نے شرکاء سے خطاب کرتے ہوئے کہا کہ وزیرِ اعلیٰ کے وژن کے مطابق دھی رانی پروگرام کے تحت مستحق بچیوں کے لیے سہولیات اور حقوق کا عملی تحفظ یقینی بنایا گیا ہے۔ انہوں نے مزید بتایا کہ گزشتہ دو برسوں میں محکمہ سماجی بہبود نے شاندار کارکردگی کا مظاہرہ کرتے ہوئے ہمت کارڈ اور وہیل چیئرز سمیت دیگر اہم فلاحی منصوبوں کا کامیابی سے اجرا کیا ہے۔ ان کا کہنا تھا کہ دھی رانی پروگرام کے تحت تمام عوامی منصوبے انتہائی شفاف انداز میں نافذ کیے گئے ہیں اور ہر مستحق جوڑے کو دو لاکھ روپے کی مالی امداد براہِ راست اے ٹی ایم کے ذریعے فراہم کی گئی ہے۔ وزیرِ سماجی بہبود نے اس عزم کا اظہار کیا کہ وزیرِ اعلیٰ پنجاب ایک ماں کے دل کے ساتھ مستحق جوڑوں کی شادیوں کا فریضہ سرانجام دے رہی ہیں اور ریاست کو صحیح معنوں میں ایک شفیق ماں کا درجہ دے رہی ہیں۔ تقریب کے اختتام پر سہیل شوکت بٹ نے نئے شادی شدہ جوڑوں کے ساتھ تصاویر بنوائیں اور اپنے ہاتھوں سے مستحقین میں اے ٹی ایم کارڈز تقسیم کیے۔