خیبر پختونخوا، بلوچستان کے حالات سنگین، دہشت گردی کے اسباب کو ختم کرنا ہوگا، حافظ نعیم الرحمن

لاہور( نمائندہ خصوصی)امیر جماعت اسلامی پاکستان حافظ نعیم الرحمن نے کہا ہے کہ حکمران پانچ فروری کو یوم یکجہتی کشمیر رسم کے طور پر نہ منائیں، مقبوضہ وادی میں بھارتی تسلط اور ظلم کے خلاف واضح اور جاندار موقف اپنایا جائے۔ خیبر پختونخواہ اور بلوچستان کے حالات سنگین ہیں، دہشت گردی کے خاتمہ کے لیے اسباب پر غور کرنا ہوگا۔ ملک میں دہشت گردی کی بڑی وجہ امریکہ سے دوستی ہے۔ پاکستان کا غزہ امن بورڈ کا حصہ بننا قوم کسی صورت قبول نہیں کرے گی۔ ان خیالات کا اظہار انہوں نے منصورہ مرکزی تربیت گاہ کے شرکائ سے خطاب اور میڈیا سے گفتگو کرتے ہوئے کیا۔ سیکرٹری اطلاعات شکیل ترابی، ناظم تربیت گاہ حافظ سیف الرحمن بھی اس موقع پر موجود تھے۔امیر جماعت اسلامی نے کہا کہ ن لیگ اور پیپلز پارٹی گزشتہ کئی دہائیوں سے حکمرانی کررہی ہیں ، ان کا طرزِ حکمرانی دنیا میں بدترین گورننس کی مثال ہے، ملک کے ہر شعبہ کو تباہ کرنے کے بعد شریف اور بھٹو خاندان کی تیسری نسل کو حکمرانی کے لیے تیار کیا جارہا ہے، خدا کا شکر ہے کہ اب عوام ان کے بہکاوے میں نہیں آرہے۔ انہوں نے کہا کہ بلاول بھٹو کو ونڈر بوائے (Wonder Boy) کے طور کے پیش ہونے کے بعد اب مریم نواز نے بھی ونڈر لیڈی (Wonder Lady) کی حیثیت سے بریفنگ دی ہے تاہم ونڈر لیڈی کی برین ڈرین سے متعلق گفتگو پر ماتم کرنے کو دل کرتا ہے، پنجاب کے حکمرانوں کو ادارکاریوں کے علاوہ اور کچھ نہیں آتا۔ امیر جماعت اسلامی نے سوال کیا کہ حکمرانوں کے بقول پنجاب میں گورننس بہتر ہے تو سکولوں کو پرائیویٹ سیکٹر کے حوالے کیوں کیا جارہا ہے؟ عوام سے خوفزدہ ن لیگ پنجاب میں غیر جمہوری، عوام دشمن بلدیاتی قانون لے کر آئی۔ فارم سنتالیس کی مدد سے سندھ پر پیپلز پارٹی قابض ہے ، سترہ برس سے صوبہ پر قابض پارٹی نے کراچی میئر کی سیٹ پر بھی قبضہ کیا اور شہر کی قومی و صوبائی اسمبلی کی سیٹیں بھی ہتھیا لیں۔ وزیراعلیٰ سندھ بتائیں کہ قابضین کو قبضہ گروپ نہ کہا جائے تو اور کیا کہیں؟ انہوں نے کہا کہ ملک میں افسر شاہی کا راج ہے، مقامی حکومتوں کا موثر نظام موجود نہیں۔ جماعت اسلامی کراچی میں قبضہ گروپ کا قبضہ چھڑائے گی، 14 فروری کو بھرپور احتجاج ہوگا، بااختیار بلدیاتی نظام کی جدوجہد جاری رہے گی۔بلوچستان اور کے پی میں جاری دہشت گردی کی لہر سے متعلق گفتگو کرتے ہوئے حافظ نعیم الرحمن نے حکمرانوں کو ایک دفعہ پھر باور کرایا کہ طاقت سے مسائل حل نہیں ہوں گے، عوام کو حقوق دینا ہوں گے۔ نوجوانوں کو روزگار اور تعلیم میسر نہیں ہوں گے تو یہ ملک دشمن عناصر کے ہتھے چڑھیں گے۔ بلوچستان کے عوام کو عزت دی جائے۔ نام نہاد امریکی جنگ میں شمولیت کے نتائج قوم پچیس برس سے بھگت رہی ہے ، حکمران ٹرمپ کی چاپلوسی کی بجائے قوم کے وقار کو مدنظر رکھتے ہوئے فیصلے کریں اور پالیسیاں تشکیل دیں۔ دنیا کا امن تباہ کرنے پر تُلے ہوئے ٹرمپ کو وزیراعظم شہباز شریف نے امن کے نوبل انعام کے لیے نامزد کرکے ملک و قوم کے وقار کا سودا کیا۔امیر جماعت اسلامی نے کہا کہ ستتر برس کے بعد بھی قیام پاکستان کے مقاصد حاصل نہیں ہوئے، خدا کی مرضی کے بغیر نظام خدا سے بغاوت ہے، جماعت اسلامی کی سیاست ذات یا مفادات کی اسیر نہیں ، جماعت اسلامی اقامت دین اور امت کے اتحاد کی جدوجہد کررہی ہے۔ ملک میں چہرے نہیں نظام بدلنے کی ضرورت ہے۔ جماعت اسلامی نوجوانوں کو ساتھ کر ملک میں حقیقی تبدیلی لے کر آئے گی۔