لاہور ( نمائندہ خصوصی):وزیرِ اعظم محمد شہباز شریف نے آسٹریلیا کے خلاف ٹی ٹونٹی کرکٹ سیریز میں کلین سویپ پر قوم کو مبارک باد دیتے ہوئے پاکستانی کرکٹ ٹیم کی شاندار کارکردگی کی پذیرائی کی ہے۔اتوار کو وزیر اعظم آفس کے میڈیا ونگ کی طرف سے جاری بیان کے مطابق وزیر اعظم نے کہا کہ قومی کرکٹ ٹیم نے انتہائی شاندار کھیل کا مظاہرہ کرتے ہوئے ٹی ٹونٹی
سیریز کے تمام میچز اپنے نام کئے، قومی ٹیم کے کھلاڑیوں نے کھیل کے دوران بیٹنگ، باؤلنگ اور فیلڈنگ سمیت تینوں شعبوں میں غیر معمولی مہارت، جذبے اور ٹیم ورک کا مظاہرہ کیا، کھلاڑیوں کی محنت، نظم و ضبط اور جذبے کی بدولت یہ کامیابی ممکن ہوئی۔وزیر اعظم نے چیئرمین پاکستان کرکٹ بورڈ محسن نقوی ،کھلاڑیوں اور ٹیم مینجمنٹ کو خراج تحسین پیش کرتے ہوئے اس توقع کا اظہار کیا کہ جیت کا یہ شاندار سلسلہ آئندہ بھی برقرار رہے گا۔
