وزیراعظم محمد شہباز شریف سے قطر کے امیر شیخ تمیم بن حمد الثانی کا ٹیلی فونک رابطہ، برادرانہ تعلقات کو مزید مستحکم کرنے کے مشترکہ عزم کا اعادہ

اسلام آباد:( نمائندہ خصوصی)وزیراعظم محمد شہباز شریف اور قطر کے امیر شیخ تمیم بن حمد الثانی نے پاکستان اور قطر کے درمیان برادرانہ تعلقات کے مزید مستحکم کرنے کے مشترکہ عزم کا اعادہ اور مشرق وسطیٰ کی حالیہ پیش رفت پر تبادلہ خیال کیا ہے۔بدھ کو وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف کو قطر کے امیر شیخ تمیم بن حمد الثانی نے ٹیلی فون کیا۔ گفتگو کے دوران دونوں رہنمائوں نے پاکستان اور قطر کے درمیان دوطرفہ تعلقات کی موجودہ رفتار پر اطمینان کا اظہار کیا،برادرانہ تعلقات کو مزید مستحکم کرنے کے مشترکہ عزم کا اعادہ کیا اور مشرق وسطیٰ کی حالیہ پیش رفت پر بھی تبادلہ خیال کیا۔وزیراعظم نے خطے میں امن، مذاکرات اور ثالثی کے فروغ میں قطر کے تعمیری اور فعال کردار کو سراہا اور سفارتی حل کے ذریعے کشیدگی کو کم کرنے کے لیے قطر کی بامعنی کوششوں کا اعتراف کیا۔انہوں نے قطری قیادت کو یقین دلایا کہ پاکستان بھی علاقائی امن و استحکام کے لیے اپنا مثبت کردار ادا کرتا رہے گا۔دونوں رہنمائوں نے آنے والے دنوں میں قریبی رابطے میں رہنے پر اتفاق کیا۔