کراچی میں اربن فلڈ وارننگ سے نمٹنے کے لیے ہنگامی اقدامات کیے گئے ہیں، منصور احمد شیخ

کراچی (نمائندہ خصوصی)چیئرمین ٹاؤن میونسپل کارپوریشن صدر اور پی ٹی آئی کراچی ڈویژن کے سینئر نائب صدر منصور احمد شیخ نے کراچی میں اربن فلڈنگ کی وارننگ جاری ہونے کے بعد مختلف علاقوں کا دورہ کیا، انتظامات کا جائزہ لیا اور ہنگامی صورتحال کی صورت میں فوری اقدامات کی ہدایات جاری کیں۔اس موقع پر میڈیا سے گفتگو کرتے ہوئے منصور احمد شیخ نے کہا کہ محکمہ موسمیات کی جانب سے کراچی میں تیز بارشوں اور ممکنہ اربن فلڈنگ کی وارننگ جاری کی گئی ہے، اس تناظر میں صدر ٹاؤن کی انتظامیہ کو الرٹ کر دیا گیا ہے۔ کسی بھی ہنگامی صورتحال سے نمٹنے کے لیے عملے کو مکمل طور پر متحرک کر دیا گیا ہے۔منصور احمد شیخ نے کہا کہ عوام کی خدمت ہمارا اولین فرض ہے۔ عوام نے ہمیں اپنے ووٹ سے منتخب کیا ہے اور ان کی خدمت میں کسی قسم کی کوتاہی برداشت نہیں کی جائے گی۔ صدر ٹاؤن میں گرین بیلٹ کی تعمیر، شجرکاری مہم، سڑکوں کی تعمیر، پارکوں کی بحالی اور اسٹریٹ لائٹس سمیت دیگر عوامی منصوبے مکمل کر دیے گئے ہیں، جبکہ مزید ترقیاتی منصوبوں پر کام تیزی سے جاری ہے۔مزید برآں، منصور احمد شیخ نے خیبر پختونخوا میں حالیہ سیلابی تباہ کاریوں اور قیمتی انسانی جانوں کے ضیاع پر افسوس کا اظہار کیا۔ انہوں نے کہا کہ مشکل کی اس گھڑی میں پوری قوم سیلاب متاثرین کے ساتھ کھڑی ہے اور مخیر حضرات کو چاہیے کہ وہ امدادی سرگرمیوں میں بڑھ چڑھ کر حصہ لیں۔