عالمی یوم ماحولیات کے موقع پر سنو لیپرڈ فائونڈیشن کو نیشنل بائیو ڈائیورسٹی کنزرویشن ایوارڈ سے نوازا گیا

اسلام آباد۔(اسٹاف رپورٹر ):عالمی یوم ماحولیات کے موقع پر سنو لیپرڈ فائونڈیشن (ایس ایل ایف)کو نیشنل بائیو ڈائیورسٹی کنزرویشن ایوارڈ سے نوازا گیا۔ یہ اعزاز ایس ایل ایف کی حیاتیاتی تنوع کے تحفظ کیلئے کی جانی والی کوششوں کے ساتھ ساتھ پاکستان کے صوبہ خیبر پختونخوا، گلگت بلتستان اور آزاد کشمیر میں جنگلی حیات کے تحفظ، مقامی لوگوں کی زندگیوں میں بہتری لانے کے لئے اٹھائے گئے اقدامات کا اعتراف ہے۔ ایک سال کے دوران ایس ایل ایف کو دوسرا ملکی سطح کا ایوارڈ ملاہے۔اس سے قبل ایس ایل ایف کے ڈپٹی ڈائریکٹر ڈاکٹر جعفر الدین کو 2023 میں ورلڈ مائونٹین ڈے کے موقع پر ایس ایل ایف مائونٹین کنزرویشن ایوارڈ سے نوازا گیا تھا۔ڈویلپمنٹ کمیونیکیشن نیٹ ورک (Devcom-Pakistan)، پاکستان انوائرنمنٹ پروٹیکشن ایجنسی اور دیگر اداروں نے بہترین ماحول دوست اقدامات کو اجاگر کرنے کے لیے پاکستان انوائرنمنٹل ایوارڈ متعارف کرائے ہیں۔ عالمی یوم ماحولیات کو دیا جانے والا یہ ایوارڈ کارپوریٹ سماجی ذمہ داری اور موسمیاتی تبدیلیوں کے حوالوں سے ان تنظیموں کے ذمہ دارانہ کردار کو تسلیم کرتا ہے۔ایس ایل ایف سنو لیپرڈ پروگرام کے ذریعے ہمالیہ، قراقرم اور ہندوکش کی 50 وادیوں میں 40,000 گھرانوں کو سہولیات پہنچانے میں سرگرم عمل ہے،پروگرامز میں خاص طور پر ایکو سسٹم ہیلتھ پروگرام کے تحت سالانہ 400,000 مویشیوں کی ویکسنیشن کی جاتی ہے جس سے پہاڑی علاقوں میں رہائش پذیر کمیونٹیز کے مال مویشی مختلف بیماریوں سے محفوظ رہتے ہیں اور مویشیوں پر مبنی آمدنی میں بھی اضافہ ہوتا ہے۔معاشی بہتری کے لئے ذمہ دار سیاحت، متبادل توانائی کی فراہمی اور پھلدار درختوں کی شجرکاری جیسے اقدامات بھی شروع کئے ہیں جس سے 20,000 سے زیادہ گھرانوں کو فائدہ پہنچا ہے۔ 40,000 مربع کلومیٹر پر کی گئی وسیع تحقیق نے حیاتیاتی تنوع اور موسمیاتی تبدیلی کے اثرات کو سمجھنے اور حساس ماحولیاتی نظام میں بقائے باہمی کے لیے موثر حکمت عملی کے لئے کئی اہم تجاویز بھی سامنے لائی گئیں۔ 900 سے زائد افراد کو جنگلی حیات کے سروے کی تکنیکوں میں تربیت اور اعلیٰ تعلیم کے لئے سپورٹ فراہم کی گئی ہےجس کے نتیجے میں 50 طلبہ نے ایم فل اور 6 نے پی ایچ ڈی کی ڈگریاں حاصل کر لی ہیں۔ملکی سطح پر اہم ایوارڈ سے نوازے جانے پر سنو لیپرڈ فائونڈیشن کے ڈائریکٹر ڈاکٹر علی نواز نے تمام ذمہ دار اداروں کا شکریہ ادا کیا۔ انہوں نے جنگلی حیات اور حیاتیاتی تنوع کے تحفظ کے لیے ایس ایل ایف کی کوششوں کو مزید بہتر طریقے سے جاری رکھنے کے عزم کا اظہارکیا۔ڈاکٹر نواز نے اس بات پر بھی روشنی ڈالی کہ فائونڈیشن اینگیج،ایجوکیشن اینڈ کنزرو کے رہنما اصولوں کے تحت متعدد اقدامات کو آگے بڑھا رہی ہے۔ ان کوششوں کا مقصد کمیونٹی کی شمولیت کو فروغ دینا، ماحولیاتی تحفظ کے حوالے سے آگہی اور مستقبل کی نسلوں کے لیے جنگلی حیات کے تحفظ کو یقینی بنانا شامل ہیں۔ ڈاکٹر نواز نے جنگلی حیات اور ماحولیاتی نظام کے تحفظ کے لیے ایس ایل ایف کی طرف سے اقدامات جاری رکھنے کے عزم کا اعادہ کیا۔