بالی وڈ کے کنگ خان کہلائے جانے والے شاہ رخ خان پہلی بار مشہور ہدایتکار راج کمار ہیرانی کی فلم میں اداکاری کرتے نظر آئیں گے۔
بھارتی میڈیا رپورٹس کے مطابق 2018 سے فلموں سے دور شاہ رخ خان کے مداح انہیں دوبارہ پردے پر دیکھنے کیلئے بے تاب ہیں تاہم اب رپورٹس سامنے آرہی ہیں کہ بالی وڈ کے بادشاہ منا بھائی، 3 ایڈیٹس ، پی کے اور سنجو جیسی فلموں کے ہدایتکار راج کمار ہیرانی کے ساتھ پہلی بار فلموں میں کام کرتے دکھائی دیں گے۔
رپورٹس کے مطابق فلم کی پری پروڈکشن کا کام شروع ہو چکا ہےجبکہ فلم کا سیٹ ممکنہ طور پر جلد ہی ممبئی کے فلم سٹی اسٹوڈیو میں تعمیر کیا جائے گا، جس کے لیے چند دنوں میں تعمیراتی کام شروع ہونے کی امید ہے۔
بھارتی میڈیا کی رپورٹ میں مزید بتایا گیا ہے کہ فلم کے کچھ حصوں کی شوٹنگ کے لیے کاسٹ اور عملے کے لندن اور بوڈاپیسٹ جانے کی بھی توقع ہے۔
اس کے علاوہ فلم کی ہیروئن کی بات کریں تو اطلاعات سامنے آرہی ہیں کے ممکنہ طور پر اداکارہ تاپسی پنو پہلی بار اس فلم میں شاہ رخ خان کے ساتھ کام کرتی نظر آئیں گی۔
رپورٹس کے مطابق فلم کی شوٹنگ رواں سال مارچ میں شروع ہونے کے امکانات ہیں۔
واضح رہے کہ شاہ رخ خان ان دنوں اپنی نئی آنے والی فلم پٹھان کی شوٹنگ میں مصروف ہیں۔
