لاہور(اسپورٹس رپورٹر):قذافی اسٹیڈیم میں کھیلے گئے ایچ بی ایل پی ایس ایل 11 کے ایک سنسنی خیز مقابلے میں کراچی کنگز نے خوشدل شاہ کی جارحانہ بلے بازی اور کپتان ڈیوڈ وارنر کی ذمہ دارانہ اننگز کی بدولت لاہور قلندرز کو 5 وکٹوں سے شکست دے دی۔200رنز کے بڑے ہدف کے تعاقب میں کراچی کنگز کی شروعات مایوس کن رہی جب جیسن رائے جلد پویلین لوٹ گئے۔ تاہم، کپتان ڈیوڈ وارنر نے ایک اینڈ سنبھالے رکھا اور 44 گیندوں پر 63 رنز کی ناقابلِ شکست 
اننگز کھیل کر ٹیم کو سنبھارا۔ ریضا ہینڈرکس (10) اور سلمان آغا (14) کے جلد آٹ ہونے کے بعد معین علی نے میچ کا پانسہ پلٹا۔ معین علی نے محض 17 گیندوں پر 39 رنز کی برق رفتار اننگز کھیلی، جس میں چار فلک شگاف چھکے شامل تھے۔انہوں نے وارنر کے ساتھ مل کر 58 رنز کی اہم شراکت داری قائم کی جس نے کراچی کی جیت کی امیدیں روشن کیں۔میچ کا اصل رخ اس وقت بدلا جب خوشدل شاہ میدان میں اترے۔ انہوں نے ناقابلِ یقین بلے بازی کا مظاہرہ کرتے ہوئے صرف 14 گیندوں پر 44 رنز کی دھواں دھار اننگز کھیلی۔ خوشدل شاہ نے شاہین شاہ آفریدی کے ایک ہی اوور میں 
جارحانہ بیٹنگ کر کے میچ کا نقشہ ہی بدل دیا اور آخر میں لگاتار دو چھکے جڑ کر 8 گیندیں قبل ہی اپنی ٹیم کو فتح سے ہمکنار کر دیا۔اس سے قبل، لاہور قلندرز نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 199 رنز کا بھاری مجموعہ ترتیب دیا تھا۔ قلندرز کی اننگز کی بنیاد فخر زمان اور عبداللہ شفیق کے درمیان 110 رنز کی شاندار شراکت پر رکھی گئی تھی۔فخر زمان نے 41 گیندوں پر 61 جبکہ عبداللہ شفیق نے 36 گیندوں پر 62 رنز کی دلکش اننگز کھیلی۔محمد فاروق کی جلدوکٹ گرنے کے بعد دونوں بلے بازوں نے کراچی کے بالرز پر دبا برقرار رکھا۔ تاہم، معین علی نے 
دو اہم وکٹیں لے کر رنز کی رفتار کو بریک لگایا۔ اننگز کے اختتام پر سکندر رضا (18 ناٹ آٹ)، ڈینئل سیمز (20) اور شاہین شاہ آفریدی (10) نے اسکور کو 199 تک پہنچانے میں اہم کردار ادا کیا۔کراچی کنگز کی جانب سے معین علی سب سے کامیاب بالر رہے جنہوں نے 26 رنز دے کر 2 وکٹیں حاصل کیں، جبکہ حسن علی اور رضوان اللہ نے ایک ایک وکٹ لی۔ لاہور قلندرز کی طرف سے عبید شاہ نے عمدہ بالنگ کرتے ہوئے 3 کھلاڑیوں کو آٹ کیا، لیکن خوشدل شاہ اور وارنر کی بلے بازی کے سامنے قلندرز کا دفاع ریت کی دیوار ثابت ہوا۔
