ڈی آئی خان (نمائندہ خصوصی ) ڈی آئی خان روڈ پر کار سواروں کی فائرنگ سے 4افراد جاں بحق 6زخمی ہوگئے۔تفصیلات کے مطابق بنوں میں ڈی آئی خان روڈ پر کار سواروں کی اندھا دھند فائرنگ کے نتیجے میں 4افراد جاں بحق اور 6زخمی ہوگئے۔واقعے کی اطلاع ملتے ہی پولیس اور ریسکیو کی ٹیمیں جائے وقوعہ پرپہنچ گئیں اور لاشوں اور زخمیوں کو ڈسٹرکٹ ہیڈکوارٹر ہسپتال منتقل کردیا۔ ریسکیو حکام کے مطابق جاں بحق ہونے والوں میں ایک بچہ اور پولیس اہلکار بھی شامل ہے۔پولیس حکام نے واقعے سے متعلق بتایا کہ ابتدائی تفتیش اور عیننی شاہدین کے بیانات لئے گئے ہیں، جس میں انکشاف ہوا ہے کہ سفید رنگ کی ویگو گاڑی میں سوا موٹر سائیکل پر سوار دو افراد کا پیچھا کر رہے تھے، اور موٹرسائیکل کے قریب پہنچتے ہی ویگو گاڑی میں موجود مسلح افراد نے فائرنگ کردی۔پولیس کے مطابق فائرنگ کے نتیجے میں ایک موٹر سائیکل سوار موقع پر جاں بحق ہوگیا اور اس کے ساتھ بیٹھا دوسرا فرد فرار ہو رہا تھا کہ چکر منڈان کے مقام پر پرائیویٹ سکول کے قریب اس پر بھی اندھا دھند فائرنگ کی گئی اور وہ بھی جاں بحق ہوگیا۔حکام نے بتایا کہ جہاں دوسرے فرد کو نشانہ بنایا گیا وہاں سکول کے بچے بھی فائرنگ کی زد میں آگئے اور قریب ہی کھڑا پولیس اہلکار بھی فائرنگ کی زد میں آکر جاں بحق ہوگیا، جب کہ ایک اسکول کا طالب علم بھی جاں بحق ہونے والوں میں شامل ہے۔پولیس حکام کے مطابق جاں بحق ہونے والا پولیس اہلکار سادہ کپڑوں میں تھا اور اس کی شناخت عارف کے نام سے ہوئی، جبکہ زخمیوں میں 13سالہ سکول طالبعلم ولید عمر بھی شامل ہے۔
