اسلام آباد (نمائندہ خصوصی )وزیر خزانہ اسحق ڈار نے توانائی کے شعبے میں اصلاحات کی اہمیت کو اجاگر کرتے ہوئے کہا ہے کہ ملک کی اقتصادی ترقی کے لیے توانائی کے شعبے میں اصلاحات بہت ضروری اور ناگزیرہیں، حکومت توانائی کے شعبے کے مسائل بشمول گردشی قرضے کو حل کرنے کو ترجیح دیتی ہے ، متعلقہ حکام توانائی کے شعبے کے تمام مسائل کے حل کے لیے قابل عمل حل نکالیں۔وفاقی وزیر خزانہ و محصولات سینیٹر محمد اسحاق ڈار نے خزانہ ڈویژن میں توانائی کے شعبے میں اصلاحات کے حوالے سے اجلاس کی صدارت کی۔اجلاس میں وزیر مملکت برائے خزانہ و محصولات ڈاکٹر عائشہ غوث پاشا، وزیر مملکت برائے پٹرولیم مصدق مسعود ملک، وزیراعظم کے معاون خصوصی برائے خزانہ طارق باجوہ، سیکرٹری خزانہ، سیکرٹری وزارت بجلی اور دیگر اعلیٰ حکام نے شرکت کی۔اجلاس کے دوران توانائی کے شعبے میں مختلف اصلاحات متعارف کرانے اور اس شعبہ میں سٹاک اور گردشی قرضہ کے مسائل پر تبادلہ خیال کیا گیا۔وزیر خزانہ نے توانائی کے شعبے میں اصلاحات کی اہمیت کو اجاگر کرتے ہوئے کہا کہ ملک کی اقتصادی ترقی کے لیے توانائی کے شعبے میں اصلاحات بہت ضروری اور ناگزیرہیں۔ انہوں نے مزید کہا کہ موجودہ حکومت توانائی کے شعبے کے مسائل بشمول گردشی قرضے کو حل کرنے کو ترجیح دیتی ہے تاکہ اس شعبے کو مالی طورپرمستحکم کیا جائے اوراس طرح ملک کی اقتصادی ترقی کی جاسکے۔ انہوں نے متعلقہ حکام کو مزید ہدایت کی کہ وہ توانائی کے شعبے کے تمام مسائل کے حل کے لیے قابل عمل حل نکالیں۔
