کراچی(نمائندہ خصوصی) سابق صدر آصف زرداری نے کہا ہے کہ انسانی حقوق انسانی آزادی کے لیے پہلا قدم ہے۔انسانی حقوق کے عالمی دن کے موقع پر سابق صدر آصف زرداری نے اپنے پیغام میں کہا کہ ذوالفقار بھٹو نے 1973 کے آئین میں انسانی حقوق کی ضمانت دی، محترمہ بینظیر بھٹو شہید انسانی حقوق کی علمبردار تھیں۔پاکستان پیپلزپارٹی کی قیادت اور کارکنوں نے انسانی حقوق کی بحالی کے لئے کئی دہائیوں تک جدوجہد کی۔ پاکستان پیپلزپارٹی جب بھی اقتدار میں آئی انسانی حقوق کو یقینی بنایا۔انہوں نے کہا کہ مقبوضہ کشمیر میں انسانی حقوق کی خلاف ورزی معمول بن چکا ہے، عالمی دنیا مقبوضہ کشمیر میں انسانی حقوق کی پامالی پر آواز بلند کرے۔پاکستان پیپلزپارٹی انسانی حقوق کی فراہمی کی وکالت کرتی رہے گی۔
