اسلام آباد۔(نمائندہ خصوصی):پاکستان رائفل ٹیم نے ایف کلاس برٹش اوپن 2026 میں13 تمغوں کے ساتھ شاندار کارکردگی کا مظاہرہ کیا۔ بسلی برطانیہ میں منعقدہ بین الاقوامی شوٹنگ ٹورنامنٹ میں12رکنی پاکستانی ٹیم نے7گولڈ میڈلز سمیت 13تمغے اپنے نام کئے۔لیفٹیننٹ جنرل احسن گلریز کی زیرقیادت پاکستانی ٹیم نے دنیا کے 24 ممالک سے شریک تقریباً 185 بہترین نشانہ بازوں کا مقابلہ کیا۔پاکستانی نشانہ بازوں نے انفرادی اورمجموعی مقابلوں میں اپنی صلاحیت، تسلسل اورمسابقتی برتری کا شاندار مظاہرہ کیا۔حذیفہ گل نے بہترین کارکردگی کا مظاہرہ کرتے ہوئے مختلف مقابلوں میں 4 طلائی، 2 چاندی اور 1 کانسی کا تمغے جیتے۔ایف کلاس برٹش اوپن 2026 میں احسن گل نے 
1000 یارڈزمقابلوں میں 2 طلائی تمغے حاصل کیے۔ محمد ولید نے 1000 گز کےمقابلے میں طلائی اور ایف ٹی آر مجموعی مقابلے میں کانسی کا تمغہ جیتا، عبید ابراہیم اور جنید علی نے بھی 800 گز کے مقابلوں میں کانسی کے تمغے حاصل کیے۔برٹش اوپن میں شاندار کامیابی کے بعد پاکستان کی قومی شوٹنگ ٹیم نے بین الاقوامی چیمپئن شپ کیلئے بھی کوالیفائی کر لیا۔پاکستان لانگ رینج رائفل ایسوسی ایشن کے مطابق یہ کامیابی لانگ رینج رائفل شوٹنگ میں پاکستان کی بڑھتی ہوئی مہارت اورعالمی سطح پر بہترین مقابلے کی اہلیت کا ثبوت ہے۔پاکستانی شوٹرزنے دنیا کے صف اول کے تجربہ کاررائفل شوٹرزکے خلاف اپنی مہارت اورمسابقتی صلاحیتوں کا لوہا منوایا ہے۔ایف کلاس شوٹنگ مقابلے میں پاکستانی ٹیم کی شاندار کارکردگی اس بات کا ثبوت ہے کہ ملک میں ہر کھیل کا بہترین ٹیلنٹ موجود ہے۔
