وزیراعلیٰ سندھ مراد علی شاہ کا اساتذہ کی حاضری یقینی بنانے کےلیے انقلابی اقدام اسکولوں میں اب چہرے کی شناخت سے حاضری لگے گی اور ترقی بھی ہوگی

کراچی (نمائندہ خصوصی): وزیراعلیٰ سندھ سید مراد علی شاہ نے فیشل ریکگنیشن اٹینڈنس مانیٹرنگ اینڈ ایویلیوایشن سسٹم (فریمز) کے آغاز کی منظوری دے دی ہے، جو تعلیم کے شعبے میں شفافیت، جوابدہی اور نگرانی کو مضبوط بنانے کے لیے ایک اہم ڈیجیٹل گورننس اقدام ہے۔ یہ نظام 17 اگست 2026 سے صوبے کے چھ اضلاع میں شروع کیا جائے گا، جس کے بعد مرحلہ وار اسے دیگر اضلاع تک توسیع دی جائے گی۔یہ فیصلہ وزیراعلیٰ سندھ سید مراد علی شاہ کی زیر صدارت وزیراعلیٰ ہاؤس میں محکمہ اسکول ایجوکیشن کے اعلیٰ سطح کے اجلاس میں کیا گیا۔ اجلاس میں وزیر تعلیم سید سردار علی شاہ، چیف سیکریٹری سندھ آصف حیدر شاہ، سیکریٹری اسکول ایجوکیشن زاہد عباسی، پرنسپل سیکریٹری وزیراعلیٰ آغا واصف، ڈائریکٹر جنرل مانیٹرنگ اینڈ ایویلیوایشن اور دیگر اعلیٰ حکام نے شرکت کی۔بریفنگ کے دوران وزیراعلیٰ سندھ کو بتایا گیا کہ فریمز کے پہلے مرحلے میں چھ اضلاع شامل ہوں گے، جبکہ سندھ کے ہر ڈویژن سے ایک ضلع منتخب کیا گیا ہے۔ وزیر تعلیم سید سردار شاہ نے وزیراعلیٰ سندھ کو بتایا کہ منتخب اضلاع کے تمام تدریسی اور غیر تدریسی عملے کو پہلے ہی نظام میں رجسٹر کرلیا گیا ہے اور عملدرآمد کے لیے ضروری تیاریاں مکمل کرلی گئی ہیں۔اجلاس کو بتایا گیا کہ فریمز چہرے کی شناخت پر مبنی حاضری اور نگرانی کا نظام ہے، جسے عملے کی حاضری کی حقیقی وقت میں تصدیق کے لیے تیار کیا گیا ہے۔ یہ ایپلی کیشن آن لائن اور آف لائن دونوں طریقوں سے کام کرے گی، جس سے محدود انٹرنیٹ سہولت والے علاقوں میں بھی اس کا استعمال بلا تعطل جاری رہے گا۔اسکولوں کی جیو ٹیگنگ مکمل کرلی گئی ہے، جبکہ نظام اساتذہ اور دیگر عملے کے آنے اور جانے کے اوقات ریکارڈ کرے گا اور حاضری کا درست اور ناقابلِ ردوبدل ریکارڈ تیار کرے گا۔وزیراعلیٰ سندھ مراد علی شاہ نے اس اقدام کو تعلیمی نظام کی حکمرانی میں ایک اہم اصلاح قرار دیتے ہوئے محکمہ اسکول ایجوکیشن کو اس کے مؤثر نفاذ کی ہدایت کی۔ انہوں نے کہا کہ تعلیمی نتائج بہتر بنانے میں اساتذہ کی حاضری ایک اہم عنصر ہے اور اسکول نظام میں جوابدہی مضبوط بنانے کے لیے ٹیکنالوجی کا استعمال ضروری ہے۔وزیراعلیٰ سندھ نے کہا کہ ہر بچے کو معیاری تعلیم حاصل کرنے کا حق ہے اور اس کے لیے ضروری ہے کہ اساتذہ اور اسکول کا عملہ اپنی ذمہ داریاں مؤثر انداز میں انجام دینے کے لیے حاضر ہوں۔ انہوں نے مزید کہا کہ فریمز حاضری کی نگرانی، نگرانی کے نظام کو بہتر بنانے اور بہتر فیصلوں میں معاونت کے لیے ایک شفاف اور قابلِ اعتماد طریقہ کار فراہم کرے گا۔وزیراعلیٰ سندھ نے سیکریٹری تعلیم زاہد عباسی کو ابتدائی مرحلے کے دوران مضبوط معاونت اور نگرانی کا نظام قائم کرنے اور اسکول انتظامیہ کو تمام ضروری تکنیکی معاونت فراہم کرنے کی ہدایت کی۔ انہوں نے یہ بھی ہدایت کی کہ چھ اضلاع میں نظام کے نفاذ کی قریبی نگرانی اور باقاعدگی سے جائزہ لیا جائے تاکہ صوبے بھر میں توسیع سے قبل نظام میں ضروری بہتری لائی جاسکے۔مراد علی شاہ نے زور دیا کہ یہ اقدام سندھ حکومت کے ٹیکنالوجی کے ذریعے حکمرانی اور عوامی خدمات کی فراہمی کو بہتر بنانے کے وسیع تر ایجنڈے کا حصہ ہے۔ انہوں نے کہا کہ یہ محض حاضری کی ایک ایپلی کیشن نہیں بلکہ حکمرانی کی ایک اہم اصلاح ہے، جو نگرانی کو مضبوط، ادارہ جاتی نظم و ضبط کو بہتر اور تعلیم کے شعبے کی مجموعی کارکردگی کو مؤثر بنائے گی۔وزیر تعلیم سید سردار علی شاہ نے اجلاس کو بتایا کہ فریمز کا آغاز سندھ میں جاری تعلیمی اصلاحات میں ایک اہم سنگ میل ہے۔ انہوں نے کہا کہ محکمہ اسکول ایجوکیشن کارکردگی، شفافیت اور جوابدہی بہتر بنانے کے لیے ٹیکنالوجی پر مبنی حل تیزی سے اختیار کررہا ہے۔وزیر تعلیم نے کہا کہ تعلیمی انتظام کا مستقبل اعداد و شمار پر مبنی حکمرانی سے وابستہ ہے۔ فریمز درست اور حقیقی وقت کی معلومات فراہم کرے گا، جس سے انتظامیہ کو بہتر فیصلے کرنے، نگرانی مؤثر بنانے اور اسکولوں میں بہتر خدمات کی فراہمی یقینی بنانے میں مدد ملے گی۔انہوں نے مزید بتایا کہ نظام کے آغاز سے قبل عملے کی رجسٹریشن، اسکولوں کی جیو ٹیگنگ اور نظام کی جانچ سمیت وسیع پیمانے پر تیاریاں مکمل کرلی گئی ہیں۔ وزیر تعلیم کے مطابق محکمہ 17 اگست سے اس نظام پر عملدرآمد شروع کرنے کے لیے مکمل طور پر تیار ہے۔اجلاس میں پہلے مرحلے کے لیے فیلڈ کی تیاری، تکنیکی انتظامات، نظام کے نفاذ کے شیڈول اور معاونتی طریقہ کار کا جائزہ لیا گیا۔ چیف سیکریٹری آصف حیدر شاہ نے وزیراعلیٰ سندھ کو بتایا کہ چھ منتخب اضلاع میں نظام کامیابی سے فعال ہونے کے بعد اسے مرحلہ وار سندھ کے تمام اضلاع تک توسیع دی جائے گی۔اجلاس کے اختتام پر وزیراعلیٰ سندھ نے جدید ڈیجیٹل حل کے ذریعے شعبہ تعلیم کو جدید بنانے کے لیے سندھ حکومت کے عزم کا اعادہ کیا۔ انہوں نے امید ظاہر کی کہ فریمز اساتذہ کی حاضری بہتر بنانے، نگرانی اور جائزے کے نظام کو مضبوط کرنے اور صوبے بھر کے بچوں کو معیاری تعلیم کی فراہمی میں معاون ثابت ہوگا۔