آئی جی سندھ نے سیکیورٹی ڈویژن اسپورٹس ایرینا کا افتتاح کر دیا

کراچی(نمائندہ خصوصی):انسپکٹر جنرل پولیس سندھ جاوید عالم اوڈھو نے سیکیورٹی ڈویژن ہیڈکوارٹرز میں نو تعمیر شدہ سیکیورٹی ڈویژن اسپورٹس ایرینا کا افتتاح کردیا۔جمعہ کو ترجمان ڈی آئی جی سیکیورٹی اینڈ ایمرجنسی سروسز ڈویژن کے مطابق آئی جی سندھ کی آمد پر ایڈیشنل آئی جی کراچی آزاد خان اور ڈی آئی جی سیکیورٹی اینڈ ایمرجنسی سروسز ڈویژن ڈاکٹر مقصود احمد نے ان کا استقبال کیا جبکہ اسپیشل سیکیورٹی یونٹ کے خصوصی دستے نے انہیں سلامی پیش کی۔اسپورٹس ایرینا اہلکاروں میں جسمانی فٹنس، صحت مند تفریحی سرگرمیوں اور کھیلوں کے فروغ کے لیے قائم کیا گیا ہے جس میں جدید بیڈمنٹن، پیڈل اور والی بال کورٹس قائم کیے گئے ہیں۔آئی جی سندھ جاوید عالم اوڈھو نے تقریب سے خطاب کرتے ہوئے کہا کہ سیکیورٹی ڈویژن اسپورٹس ایرینا کا افتتاح کرنا ان کے لیے واقعی باعثِ اعزاز اور انتہائی خوشی کی بات ہے۔ انہوں نے اس شاندار سہولت کو سیکیورٹی ڈویژن کی قیادت ، لگن اور اہلکاروں کی فلاح و پیشہ ورانہ ترقی کے عزم کا عملی مظہر قرار دیا۔ انہوں نے ڈی آئی جی سیکیورٹی اینڈ ایمرجنسی سروسز ڈویژن، ڈاکٹر مقصود احمد اور ان کی پوری ٹیم کی تعریف کرتے ہوئے کہا کہ انہوں نے ایک بہترین تصور کو حقیقت کا روپ دیا ہے،سپورٹس ایرینا بین الاقوامی معیار کا حامل ہے اور ملک کے کسی بھی پولیس ادارے میں قائم کی گئی بہترین کھیلوں کی سہولیات میں سے ایک ہے۔انہوں نے کہا کہ اسپیشل سیکیورٹی یونٹ نے ہمیشہ غیر معمولی پیشہ ورانہ صلاحیتوں اور بھرپور لگن کا مظاہرہ کیا ہے جس سے یہ اعتماد پیدا ہوتا ہے کہ صوبے کی سیکیورٹی محفوظ ہاتھوں میں ہے۔ آئی جی سندھ نے سیکیورٹی ڈویژن اور پوری سندھ پولیس کی جانب سے صوبے میں امن و امان کے قیام کے لیے کی جانے والی انتھک محنت اور شاندار کارکردگی کو سراہا۔انہوں نے سندھ پولیس کی حالیہ کامیابیوں کا ذکر کرتے ہوئے کہا کہ حالیہ برسوں میں پہلی مرتبہ قتل کی وارداتوں میں تقریبا 23 فیصد کمی، اسٹریٹ کرائم میں 11.8 فیصد کمی ریکارڈ کی گئی ہے جبکہ منظم جرائم کے خلاف نمایاں کامیابیاں حاصل کرتے ہوئے پولیس کارروائیوں میں 230 سے زائد خطرناک جرائم پیشہ عناصر کو گرفتار کیا گیا ہے۔ انہوں نے مزید کہا کہ کچے کے علاقوں میں سرگرم جرائم پیشہ عناصر پر بھی موثر انداز میں قابو پا لیا گیا ہے۔ انہوں نے اہلکاروں کی فلاح و بہبود کی اہمیت پر زور دیتے ہوئے کہا کہ اسپورٹس ایرینا کا قیام اس امر کا عکاس ہے کہ محکمہ اپنے افسران اور اہلکاروں کی جسمانی اور ذہنی صحت کے حوالے سے کس قدر سنجیدہ ہے۔ انہوں نے کہا کہ صحت مند جسم، صحت مند ذہن کی پرورش کرتا ہے، جو موثر پولیسنگ کے لیے نہایت ضروری ہے۔ انہوں نے تمام افسران اور اہلکاروں پر زور دیا کہ وہ کھیلوں اور دیگر صحت مند تفریحی سرگرمیوں میں بھرپور حصہ لیں تاکہ وہ جسمانی طور پر مضبوط، ذہنی طور پر پراعتماد اور پیشہ ورانہ طور پر مستقبل کے چیلنجز سے نمٹنے کے لیے ہر وقت تیار رہیں۔اس موقع پر ڈی آئی جی سیکیورٹی ڈاکٹر مقصود احمد نے آئی جی سندھ کا شکریہ ادا کیا اور کہا کہ سیکیورٹی ڈویژن اسپورٹس ایرینا کا افتتاح ہونا ان کے لیے انتہائی باعثِ فخر ہے۔ انہوں نے کہا کہ اگرچہ پولیس کے متعدد یونٹس میں کھیلوں کی سہولیات کا فقدان ہے اور اہلکار اپنی کڑی آپریشنل ذمہ داریوں کی وجہ سے تفریحی سرگرمیوں کے لیے وقت نہیں نکال پاتے، تاہم سیکیورٹی ڈویژن نے دستیاب وسائل کو بروئے کار لاتے ہوئے اپنے افسران اور جوانوں کی فلاح و بہبود کے لیے یہ جدید اسپورٹس ایرینا قائم کیا ہے۔انہوں نے اس بات پر زور دیا کہ اسپورٹس ایرینا ایک ایسی جگہ ہے جہاں عہدے کی بنیاد پر کوئی امتیاز نہیں بلکہ افسران اور جوان ایک ساتھ کھیلتے، تربیت حاصل کرتے اور باہمی تعاون و ٹیم ورک کے جذبے کو فروغ دیتے ہیں۔ انہوں نے مزید کہا کہ اسپورٹس ایرینا میں ایک خصوصی ریفریشمنٹ پوائنٹ بھی قائم کیا گیا ہے جہاں اہلکاروں کو تازہ جوس اور صحت بخش مشروبات فراہم کیے جائیں گے تاکہ جسمانی فٹنس کے ساتھ ساتھ صحت مند طرزِ زندگی کو بھی فروغ دیا جا سکے۔کمانڈنٹ ایس ایس یو عامر خان نیازی نے افتتاحی تقریب میں تمام معزز مہمانوں کا خیرمقدم کیا۔افتتاحی تقریب میں سابق آئی جیز، ڈی آئی جی ٹریفک پیر محمد شاہ، ڈی آئی جی ایسٹ فرخ لنجھار سمیت سینئر پولیس افسران، قونصل جنرلز اور مختلف ممالک کی سفارتی شخصیات نے بھی شرکت کی۔تقریب کے اختتام پر آئی جی سندھ اور ایڈیشنل آئی جی کراچی کو یادگاری شیلڈز پیش کی گئیں۔