پنجاب میں گڈگورننس کی عمدہ مثال، لاہور میں شدید بارشی پانی کی ایک گھنٹے سے بھی کم وقت میں نکاسی کانیا ریکارڈ

لاہور (نمائندہ خصوصی)وزیراعلیٰ مریم نواز شریف کے اقدامات کی بدولت صوبہ پنجاب نے گڈگورننس کی عمدہ مثال قائم کر دی۔ مون سون بارشوں کی تیزی کے ساتھ پنجاب حکومت کے اداروں نے بھی پانی کے نکاس کا آپریشن تیز ی سے مکمل کیا۔ ستھرا پنجاب، واسا اور دیگر اداروں نے لاہور میں شدید بارش سے جمع پانی کی ایک گھنٹے سے بھی کم وقت میں نکاسی کرکے نیا ریکارڈ قائم کر دیا۔ وزیراعلیٰ مریم نوازشریف نے تمام متعلقہ اداروں اور عملے کو شاباش دی اور تمام صورتحال کی ڈیجیٹل مانیٹرنگ کرتی رہیں۔لاہور میں 48 گھنٹے مسلسل 343 ملی میٹر بارش کے باوجود پانی جمع نہ ہونے پر شہریوں نے سکھ کا سانس لیا۔ موسلادھار بارشوں کے باوجودپوری کاوش کرکے لاہور کے بیشتر چوراہوں، شاہراہیں اور انڈر پاسز میں پانی جمع نہیں ہونے دیا گیا۔مال روڈ، کلب چوک، مین بلیوارڈ گلبرگ، لبرٹی چوک، فیروز پور روڈ کے علاقوں میں جمع شدہ بارش کے پانی کا فوری نکاس عمل میں لایا گیا۔ بنک سٹاپ،قینچی سٹاپ اور فیروز پور روڈ پر بھی چند گھنٹے میں نکاسی آب کا ٹاسک مکمل کرلیا گیا۔ کریم بلاک اقبال ٹاؤن، سمن آباد انڈر پاس اور ملحقہ علاقوں میں بھی نکاسی کے فوری بعد ٹریفک رواں دواں رہی۔لاہور میں پہلی بار نکاسی کے جدید نظام اور مون سون بارشوں کی جامع حکمت عملی کی وجہ سے شہریوں کو راستوں کی بندش سے بچایا گیا۔ وزیر اعلیٰ مریم نواز شریف کی ہدایت پرلاہور کے کمشنر، ڈپٹی کمشنر اور اسسٹنٹ کمشنرز کے علاوہ واسا،لوکل گورنمنٹ اور تمام متعلقہ اداروں کے افسران اور عملہ فیلڈ میں موجود رہے۔