اسلام آباد۔(نمائندہ خصوصی):وفاقی وزیر داخلہ محسن نقوی نے بلوچستان میں سکیورٹی فورسز کی جانب سے گزشتہ 3 روز کے دوران کامیاب آپریشنز میں’’فتنہ الہندوستان‘‘ کے 54 دہشت گردوں کو جہنم واصل کرنے پر فورسز کی کارکردگی اور بہادری کو زبردست الفاظ میں سراہا ہے۔ اپنے بیان میں انہوں نے فورسز کی پیشہ ورانہ صلاحیتوں کی 
ستائش کرتے ہوئے کہا کہ سکیورٹی فورسز کے بہادر سپوتوں نے بروقت اور موثر کارروائی کر کے بھارتی سپانسرڈ دہشت گردوں کے ناپاک عزائم کو خاک میں ملا دیا۔وزیر داخلہ محسن نقوی نے ان آپریشنز کے دوران وطن کی خاطر جام شہادت نوش کرنے والے 42 جوانوں اور شہریوں کو گہرا خراج عقیدت پیش کیا۔انہوں نے کہا کہ وطن عزیز کے ان بہادر سپوتوں نے اپنی جانوں کا نذرانہ دے کر ملک کا دفاع کیا، شہداء پوری قوم کا فخر ہیں اور قوم ان کی ان عظیم قربانیوں کی ہمیشہ مقروض رہے گی۔محسن نقوی نے کہا کہ شہداء کی یہ بے مثال قربانیاں دہشت گردی کی لعنت کے خلاف پوری پاکستانی قوم کے پختہ اور غیر متزلزل عزم کا واضح اظہار ہیں۔ انہوں نے وطن پر جان نچھاور کرنے والے شہداء کے درجات کی بلندی کے لیے دعا کرتے ہوئے کہا کہ وہ شہداء اور ان کے عظیم خاندانوں کے حوصلے کو سلام پیش کرتے ہیں جن کی بدولت آج ملک کا امن قائم ہے۔
