پاکستان میں اور خصوصاً بلوچستان میں "امن وامان "کے لئے محکمہ پولیس میں تربیت اور اصلاحات ضروری ہیں ۔محترمہ فرح عظیم شاہ

کوئٹہ ( نمائندہ خصوصی)رکنِ صوبائی اسمبلی بلوچستان اور بلوچستان عوامی پارٹی ویمن ونگ کی سربراہ اور ایمان پاکستان ٹرسٹ کی چیئرپرسن محترمہ فرح عظیم شاہ نے اپنے پوڈ کاسٹ میں گفتگو کرتے ہوئے کہا کہ ملک میں امن و امان کے قیام اور عوام کے بنیادی حقوق کے تحفظ کے لیے پولیس کی بہتر تربیت، قانون کی بالادستی اور عدالتی نظام میں مؤثر اصلاحات وقت کی اہم ضرورت ہیں۔ محترمہ فرح عظیم شاہ نے مزید کہا ہے کہ اکثر لوگ انصاف کے انتظار میں دنیا سے رخصت ہو جاتے ہیں، لیکن ان کے مقدمات برسوں تک زیرِ التوا رہتے ہیں، جو انصاف کے نظام پر ایک بڑا سوالیہ نشان ہے۔ ان کا کہنا تھا کہ کسی بھی ملک کو پُرامن اور مستحکم رکھنے کے لیے بروقت اور غیرجانبدار انصاف ناگزیر ہے۔محترمہ فرح عظیم شاہ نے کہا ہے کہ ” انصاف سب کے لیے یکساں ہونا چاہیے”۔ امیر اور غریب کے درمیان کوئی امتیاز نہیں ہونا چاہیے، بلکہ قانون کی نظر میں ہر شہری برابر ہو اور فیصلے بھی مساوی بنیادوں پر کیے جائیں۔