وفاقی وزیر مواصلات نے بحرین-کالام روڈ کی تعمیر و بحالی کیلئے این ایچ اے فنڈز سے ایک ارب روپے کی خصوصی منظوری دے دی

اسلام آباد۔ ( نمائندہ خصوصی):وفاقی وزیر مواصلات عبدالعلیم خان نے بحرین-کالام روڈ کی تعمیر و بحالی کے لیے نیشنل ہائی وے اتھارٹی (این ایچ اے) فنڈز سے ایک ارب روپے کی خصوصی منظوری دے دی ہے۔یہاں جاری بیان کے مطابق یہ اعلان پیر کے روز پارلیمنٹ ہائوس میں وفاقی وزیر برائے امور کشمیر، گلگت بلتستان و سیفران انجینئر امیر مقام سے ملاقات کے دوران کیا گیا۔اس منصوبے پر جلد عملی کام شروع کرنے کی ہدایات بھی جاری کر دی گئی ہیں۔ملاقات میں وزیر مملکت برائے اوورسیز پاکستانیز عون چوہدری اور سابق صوبائی وزیر محمد علی شاہ بھی موجود تھے۔اس موقع پر وفاقی وزیر انجینئر امیر مقام اور وفاقی وزیر عبدالعلیم خان کے درمیان باہمی دلچسپی کے مختلف امور، قومی اہمیت کے ترقیاتی منصوبوں پر تفصیلی تبادلہ خیال کیا گیا۔ انجینئر امیر مقام نے بحرین-کالام روڈ کے لیے خصوصی فنڈز کی منظوری پر وفاقی وزیر مواصلات کا شکریہ ادا کرتے ہوئے کہا کہ یہ صرف کالام اور بحرین کے عوام ہی نہیں بلکہ ملک بھر کے سیاحوں کا بھی دیرینہ مطالبہ تھا۔انہوں نے کہا کہ سڑک کی تعمیر اور بحالی سے علاقے میں سیاحت کو فروغ ملے گا، مقامی معیشت مستحکم ہوگی اور عوام کو سفری سہولیات میسر آئیں گی۔ملاقات کے دوران قومی ترقی، عوامی خدمت اور عوامی مسائل کے حل کے لیے مشترکہ کاوشوں کے عزم کا بھی اعادہ کیا گیا۔