تعلیمی اداروں میں تمباکو نوشی پر پابندی یقینی بنانے کے لئے اقدامات کئے جا رہے ہیں :مریم نوازشریف

لاہور ( نمائندہ خصوصی) وزیراعلیٰ پنجاب مریم نواز شریف نے عالمی یومِ انسدادِ تمباکو پراپنے پیغام میں کہاہے کہ تمباکو نوشی کسی بھی مہلک مرض سے زیادہ خطرناک ثابت ہو سکتی ہے-وزیراعلی مریم نوازشریف نے تمباکو کو وبا سے بھی بد تر قراردیا-تمباکو کا ہر کش، ایک نئی بیماری کی طرف قدم بڑھانے کے مترادف ہے-تمباکو نوشی محض عادت نہیں بلکہ اپنی ہی صحت،معیشت اور معاشرت پر خود کش حملے کے مترادف ہے۔ پنجاب میں سکولوں،کالجوں اورتعلیمی اداروں میں تمباکو نوشی پر پابندی یقینی بنانے کے لئے ا قدامات کئے جا رہے ہیں -وزیراعلی مریم نواز شریف نے کہاکہ سرکاری دفاتر،پبلک ٹرانسپورٹ اور دیگر عوامی مقامات پر سگریٹ نوشی جرم ہے،عملدرآمد یقینی بنائیں گے-نوجوان نسل کو تمباکو نوشی سے محفوظ رکھنے کے لئے تمام ممکنہ ا قدامات پر یقین رکھتے ہیں -تمباکو نوشی کے مضراثرات کے بارے میں آگاہی صرف حکومتی نہیں بلکہ مشترکہ سماجی ذمہ داری ہے۔ وزیراعلی مریم نوازشریف نے کہاکہ تمباکونوشی سے ملک میں اڑھائی لاکھ سے زیادہ اموات کے اعداد وشمار تشویشناک اور تکلیف دے ہیں -نوجوانوں میں ہارٹ ٹیک کی بڑی وجہ تمباکو نوشی اورویپ کااستعمال ہوسکتاہے۔اپنے پیاروں کو صحت مند اورسگریٹ کے دھوئیں سے پاک ماحول فراہم کرنا ہم سب کا فرض ہے-وزیراعلی مریم نوازشریف نے عوام سے اپیل کی کہ آج ہی سے تمباکونوشی چھوڑ کرصحت مند طرز زندگی اپنانے کاعہدکیجیے-