پٹرول اور ڈیزل کی قیمتوں میں 22 روپے کمی کا فیصلہ ،وعدہ کیا تھا جیسے ہی گنجائش ملی قیمتیں کم کریں گے،عوامی ریلیف حکومت کی اولین ترجیح ہے ، وزیر اعظم شہباز شریف

لاہور۔(نمائندہ خصوصی):وفاقی حکومت نے پٹرول اور ڈیزل کی قیمتوں میں 22 روپے کمی کا فیصلہ کیا ہے جبکہ وزیر اعظم محمد شہباز شریف نے کہا ہے کہ عوام کو ریلیف دینا انکی اولین ترجیحات میں شامل ہے۔ وزیر اعظم آفس کے میڈیا ونگ کی طرف سے جمعہ کو جاری بیان کے مطابق وزیر اعظم محمد شہباز شریف نے عید کے تیسرے دن عوام کے لئے بڑے ریلیف کا اعلان کیا ہے اور پٹرول کی قیمت میں 22 روپے اور ڈیزل کی قیمت میں بھی 22 روپے کمی کا فیصلہ کیا گیا ہے۔ بیان کے مطابق وزیراعظم نے قوم سے وعدہ کیا تھا کہ جیسے ہی گنجائش پیدا ہو گی، عوام کو ریلیف دیا جائے گا۔اس وعدے پر ہو بہو عمل کیا گیا ہے۔ وزیر اعظم نے کہا کہ عوام کو ریلیف دینا میری اولین ترجیحات میں شامل ہے۔ پچھلے ہفتے بھی عوام کو ریلیف دیا گیا اور پیٹرول اور ڈیزل کی قیمتوں میں کمی کی گئی تھی۔ بیان میں کہا گیا ہے کہ وفاقی حکومت نے سخت ترین حالات میں بھی عوام کے لئے ریلیف کا سلسلہ جاری رکھا اور پبلک/گڈز ٹرانسپورٹ اور موٹر سائیکل اور رکشہ استعمال کرنے والوں کے لئے فیول پر سبسڈی دی ۔خطے کے دوسرے ممالک میں جب پیٹرول حاصل کرنے کے لئے قطاریں لگی ہوئی تھیں، پاکستان میں وزیراعظم کے بر وقت اقدامات کی بدولت عوام کو پیٹرول اور ڈیزل دستیاب تھا۔جب دنیا میں تیل کا بد ترین بحران تھا، اس دوران عالمی منڈی میں تیل کی قیمتوں میں اضافے کے باوجود وزیراعظم کی جانب سے 130 روپے سے زائد کی سبسڈی دے کر تیل کی قیمتوں میں اضافے کو روکا گیا اور سبسڈی کی مد میں بھی عوام کو ریلیف مہیا کیا گیا۔