اسلام آباد۔(نمائندہ خصوصی):رکن قومی اسمبلی اور پاکستان پیپلز پارٹی کی سینئر رہنما شرمیلا فاروقی نے آپریشن بنیان مرصوص کی کامیابی کا ایک سال مکمل ہونے پر قوم کو مبارکباد دیتے ہوئے کہا ہے کہ معرکہ حق پاکستان کے اجتماعی عزم اور سفارتی فتح کی نشاندہی کرتا ہے جس نے بھارت کے گمراہ کن پروپیگنڈے کو ناکام بنا دیا اور عالمی سطح پر پاکستان کے موقف کو اجاگر کیا۔ ہفتہ کو میڈیا سے خصوصی گفتگو کرتے ہوئے شرمیلا فاروقی نے کہا کہ آپریشن بنیان مرصوص کی کامیابی صدر مملکت آصف علی زرداری ،وزیر اعظم محمد شہباز شریف، نائب وزیر اعظم اسحاق ڈار، فیلڈ مارشل سید عاصم منیر اور پیپلز پارٹی کے چیئرمین بلاول بھٹو زرداری کی قیادت میں مشترکہ قومی کوششوں کا نتیجہ ہے جس نے بین الاقوامی سطح پر پاکستان کے خلاف بھارت کے گمراہ کن پروپیگنڈے کو بے نقاب کیا۔انہوں نے کہا کہ اس متفقہ سیاسی اور ادارہ جاتی ردعمل نے نہ صرف مخالفانہ الزامات کا مقابلہ کیا بلکہ واضح اور 
مضبوطی کے ساتھ پاکستان کے موقف کو بھی دہرایا۔ انہوں نے مزید کہا کہ پاکستان کو بدنام کرنے کی بھارت کی بار بار کی کوششوں کو سفارتی مصروفیات اور اسٹریٹجک را بطوں کے ذریعے فیصلہ کن طور پر رد کیا گیا اور عالمی سطح پر توازن بحال ہوا۔پاکستان کی مسلح افواج کو خراج تحسین پیش کرتے ہوئے انہوں نے ایئر ڈیفنس یونٹس کی پیشہ ورانہ مہارت، تیاری اور آپریشنل مہارت کو سراہتے ہوئے قومی خودمختاری کے تحفظ اور جارحیت کو روکنے میں ان کے کردار کو اہم قرار دیا۔انہوں نے کہا کہ ان کی صلاحیتیں ملک کے دفاعی ڈھانچے کی طاقت اور لچک کی عکاسی کرتی ہیں۔ ایک سوال کے جواب میں انہوں نے سفارتی کوششوں پر روشنی ڈالی اور خاص طور پر بلاول بھٹو زرداری کی تعریف کی کہ انہوں نے بین الاقوامی پلیٹ فارمز پر پاکستان کا بیانیہ پیش کیا اور امن اور مذاکرات کے پیغام کو فروغ دیا۔انہوں نے نائب وزیر اعظم و وزیر خارجہ سینیٹر محمد اسحاق ڈار کی کوششوں کا اعتراف کرتے ہوئے کہا کہ زخمی ہونے کے باوجود وہ پاکستان کے سفارتی محاذ کو مضبوط بنانے میں سرگرم رہے۔مشکل دور میں ان کی مسلسل شراکت قومی مفاد کے لئے عزم اور ذمہ داری کی عکاسی کرتی ہے۔ انہوں نے کہا کہ بھارت نے پاکستان کے خلاف الزامات اور بیانیہ کی ہیرا پھیری کرنے کی کوشش کی لیکن قومی قیادت نے متحد ہو کر بھارتی کاوشوں کو سفارتی اور ادارہ جاتی ردعمل کے ذریعے مؤثر طریقے سے ناکام بنایا۔
