سی پیک منصوبوں سے بلوچستان میں 7300 سے زائد ملازمتیں فراہم، مزید 10,425 متوقع

اسلام آباد( نمائندہ خصوصی):چین پاکستان اقتصادی راہداری (سی پیک) کے تحت بلوچستان میں جاری اور مکمل منصوبوں کے ذریعے اب تک 7313 افراد کو روزگار فراہم کیا جا چکا ہے جبکہ مستقبل کے مراحل اور زیرِ غور منصوبوں کے تحت مزید 10,425 ملازمتیں پیدا ہونے کی توقع ہے۔ویلتھ پاکستان کو دستیاب سرکاری دستاویزات کے مطابق یہ روزگار کے اعداد و شمار سڑکوں کے بنیادی ڈھانچے، توانائی، پانی، صنعت، صحت، تعلیم اور بندرگاہ سے متعلق منصوبوں پر مشتمل ہیں۔ دستاویزات میں بتایا گیا ہے کہ جہاں کئی ملازمتیں تعمیر اور عملدرآمد کے دوران پیدا ہو چکی ہیں، وہیں آئندہ منصوبوں کے تحت مزید مواقع بھی متوقع ہیں۔سوراب-ہوشاب (این-85) منصوبے کے تحت مجموعی طور پر 101 ملازمتیں پیدا ہوئیں، جو تمام مقامی افراد کو فراہم کی گئیں۔ گوادر-ہوشاب-آواران-نال (ایم-8) اور خضدار-بسیمہ منصوبوں میں ٹھیکیداروں کے ذریعے 616 مقامی افراد کو روزگار دیا گیا۔نوکنڈی-ماشکیل-پنجگور منصوبے کے دوران 82 عارضی ملازمتیں پیدا ہوئیں۔ حبکو کول پاور منصوبے میں 627 افراد کو روزگار ملا، جن میں سے 170 کا تعلق بلوچستان سے تھا۔نیو گوادر انٹرنیشنل ایئرپورٹ منصوبے سے 107 ملازمتیں پیدا ہوئیں، جن میں 63 افراد بلوچستان ڈومیسائل کے حامل تھے، جو وفاقی حکومت کے مقرر کردہ 6 فیصد کوٹے سے زیادہ ہے۔ گوادر پورٹ اور فری زون میں 216 ملازمتیں پیدا ہوئیں، جن میں سے 214 مقامی افراد کے لیے تھیں۔دستاویزات کے مطابق ایسٹ بے ایکسپریس وے (فیز ون) کی تعمیر کے دوران تقریباً 1,400 افراد کو روزگار ملا، جن میں 200 مقامی تھے، جبکہ فیز ٹو منصوبہ بندی کے مرحلے میں ہے۔ گوادر میں ٹیکنیکل اینڈ ووکیشنل انسٹی ٹیوٹ کے گرد تعمیراتی سرگرمیوں کے دوران 1,500 افراد کو روزگار دیا گیا، جن میں 450 مقامی شامل تھے۔گوادر میں 1.2 ایم جی ڈی ڈی سیلینیشن پلانٹ کی تعمیر کے دوران تقریباً 330 افراد کو روزگار ملا، جن میں 165 مقامی تھے۔ بوستان خصوصی اقتصادی زون میں قائم صنعتی یونٹس نے 426 ملازمتیں پیدا کیں، جو تمام مقامی افراد کے لیے تھیں۔15 ہزار سولر لائٹنگ آلات منصوبے کے تحت تقریباً 1,100 کنٹریکٹ ملازمتیں پیدا ہوئیں، جن میں زیادہ تر مقامی افراد شامل تھے۔اسی طرح گوادر میں صاف پانی کی فراہمی اور ٹریٹمنٹ منصوبے کے تحت 320 ملازمتیں پیدا ہوئیں، جن می270مقامی افراد کو روزگار دیا گیا۔پاک چین فرینڈشپ ہسپتال، گوادر میں 515 ملازمتیں پیدا ہوئیں، جن میں سے 441بلوچستان ڈومیسائل کے حامل افراد کو دی گئیں۔ ویسٹ بے ایکسپریس وے گوادر میں 100 ملازمتیں پیدا ہوئیں، جن میں 9 مقامی افراد شامل تھے، جبکہ فقیر کالونی گوادر کے اسکول میں 51 ملازمتیں پیدا ہوئیں، جن میں 24 مقامی افراد شامل تھے۔مجموعی طور پر ان مکمل اور جاری منصوبوں کے تحت بلوچستان میں 7,313 ملازمتیں پیدا ہو چکی ہیں یا افراد کو روزگار دیا جا چکا ہے۔دوسری جانب، دستاویزات کے مطابق آئندہ مراحل اور زیرِ غور منصوبوں کے تحت مزید 10,425 ملازمتیں متوقع ہیں۔ بوستان خصوصی اقتصادی زون میں 24 اداروں کو الاٹ کیے گئے پلاٹس سے تقریباً 8,030 مزید ملازمتیں پیدا ہونے کی توقع ہے، جن میں اکثریت مقامی افراد کی ہوگی۔گوادر میں صاف پانی کی فراہمی اور ٹریٹمنٹ منصوبے سے مزید 300 ملازمتیں پیدا ہونے کی توقع ہے۔ سیندک کاپر/گولڈ مائننگ منصوبے سے تقریباً 1,120 ملازمتیں متوقع ہیں، جن میں سے تقریباً 950 چاغی اور قریبی علاقوں کے مقامی افراد کے لیے مختص ہوں گی۔اسی طرح گوادر میں 300 میگاواٹ کول پاور پلانٹ سے تعمیر اور آپریشن کے دوران تقریباً 575 ملازمتیں پیدا ہونے کی توقع ہے، جن میں 43 مقامی افراد کے لیے ہوں گی۔ گوادر اسمارٹ انوائرمنٹل اینڈ سینیٹیشن سسٹم کے تحت تقریباً 200 عارضی تعمیراتی ملازمتیں پیدا ہوں گی، جن میں 150 مقامی افراد کو ترجیح دی جائے گی، جبکہ مزید 200 مستقل ملازمتیں بھی پیدا ہوں گی، جن میں بھی مقامی افراد کو ترجیح حاصل ہوگی۔