اسلام آباد۔( نمائندہ خصوصی):نائب وزیراعظم و وزیرِ خارجہ سینیٹر محمد اسحاق ڈار اور آسٹریلیا کی وزیرِ خارجہ پینی وانگ کے درمیان ٹیلیفونک گفتگو ہوئی۔پیر کو وزارت خارجہ سے جاری بیان کے مطابق وزیرِ خارجہ پینی وانگ نے نائب وزیراعظم و وزیرِ خارجہ کی کاوشوں اور ایران اور امریکا کے درمیان مذاکرات میں سہولت کاری کے حوالے سے پاکستان کے 
تعمیری کردار کی تعریف کی۔ انہوں نے اس سلسلے میں سفارتی روابط کو فروغ دینے کے لئے پاکستان کے مسلسل عزم کو سراہا۔نائب وزیراعظم و وزیرِ خارجہ سینیٹرمحمد اسحاق ڈار نے انہیں 11 سے 12 اپریل کو ہونے والے ’اسلام آباد مذاکرات‘ کے بارے میں آگاہ کیا اور اس عزم کا اعادہ کیا کہ پاکستان مذاکرات اور مثبت روابط کی حوصلہ افزائی کا سلسلہ جاری رکھے گا۔دونوں رہنماؤں نے عالمی معیشت خاص طور پر ترقی پذیر ممالک پر مرتب ہونے والے وسیع تر اثرات پر تشویش کا اظہار کیا اور تنازعات کے پرامن حل کی اہمیت پر زور دیا۔
