اسلام آباد/ڈیرہ غازی خان ۔( نمائندہ خصوصی):چیئرمین سینیٹ سید یوسف رضا گیلانی اور گورنر خیبر پختونخوا فیصل کریم کنڈی نے سابق گورنر پنجاب سردار ذوالفقار علی خان کھوسہ مرحوم کے ایصالِ ثواب کے لیے منعقدہ قرآن خوانی کی تقریب میں شرکت کی۔ تقریب ڈیرہ غازی خان کی مرکزی عید گاہ میں منعقد ہوئی، جہاں سجادہ نشین دربار حضرت موسیٰ پاک شہید سید ابوالحسن گیلانی صاحب نے اجتماعی دعا کرائی جبکہ اس موقع پرسابق ممبر صوبائی اسمبلی سید احمد مجتبیٰ گیلانی صوبائی وزیر شیر علی گورچانی، مشیر وزیر برائے تاجران میاں محمد نعیم میر، سابق 
گورنر رفیق احمد رجوانہ، اراکین قومی و صوبائی اسمبلی سردار عمار اویس لغاری،رانا تنویر احمد،احمد خان لغاری،ندیم افضل چن کے علاوہ سردار نصراللہ خان دریشک،خواجہ عامر کوریجہ،سردار یوسف خان لغاری،سید عبدالعلیم شاہ،حافظ اقبال خان خاکوانی،سردار محسن عطاء کھوسہ، سردار احمد علی دریشک،سابق وزیر اعلیٰ پنجاب سردار عثمان بزدار، سمیت دیگر معززین شریک ہوئے۔ شرکاء نے مرحوم کے درجات کی بلندی اور مغفرت کے لیے دعا کی۔سینیٹ سیکرٹریٹ کے مطابق اس موقع پر مرحوم کے صاحبزادگان سردار حسام الدین کھوسہ، سردار سیف الدین کھوسہ اور سردار دوست محمد خان اور خاندان کے افراد موجود تھے۔تقریب میں سردار ذوالفقار علی خان کھوسہ کے بڑے صاحبزادے سردار حسام الدین خان کھوسہ کی دستاربندی، سابق وزیر حافظ اقبال خان خاکوانی اور سابق ایم این اے سردار امجد فاروق کھوسہ نے کی۔اس کے علاوہ سردار حسام الدین خان کھوسہ کو قبیلہ کا چیف مقرر کیا گیا۔ چئیرمین سینٹ سید یوسف رضا گیلانی نے اپنے خطاب میں سردار ذوالفقار علی خان کھوسہ کی سیاسی خدمات، اصول پسندی اور علاقے کی ترقی کے لیے ان کی کاوشوں کو خراجِ تحسین پیش کیا۔ انہوں نے کہا کہ مرحوم ایک مدبر، باوقار سیاسی اور عوام دوست رہنما تھے جن کی کمی ہمیشہ محسوس کی جائے گی۔قرآن خوانی میں شہریوں کی بڑی تعداد نے شرکت کی اور مرحوم کے ایصال ثواب کے لیے دعا کی ۔
