راولپنڈی ۔( نمائندہ خصوصی)جہلم میں معروف مذہبی اسکالر انجینئر محمد علی مرزا کی قرآن و سنت اکیڈمی کے باہر فائرنگ کرنے والا ملزم پولیس کی جوابی کارروائی میں مارا گیا، حملے کے دوران انجینئر محمد علی مرزا محفوظ رہے۔ پولیس کے بروقت رسپانس کے باعث کسی بڑے جانی نقصان سے بھی بچاؤ ممکن ہو گیا۔ آر پی او سید خالد محمود ہمدانی نے واقعہ کا فوری نوٹس لیتے ہوئے رپورٹ طلب کر لی ہے۔ ترجمان راولپنڈی پولیس کے مطابق فائرنگ کا واقعہ 
اس وقت پیش آیا جب اکیڈمی میں انجینئر محمد علی مرزا معمول کے مطابق درس دے رہے تھے کہ ایک نامعلوم حملہ آور نے اچانک اندھا دھند فائرنگ شروع کر دی۔فائرنگ کے نتیجے میں ڈیوٹی پر موجود کانسٹیبل احسن پاؤں پر گولی لگنے سے زخمی ہو گیا جسے فوری طور پر طبی امداد کے لیے قریبی ہسپتال منتقل کر دیا گیا۔ پولیس حکام کے مطابق فوری اور مؤثر کارروائی کے دوران حملہ آور کو کراس فائرنگ میں ہلاک کر دیا گیا جبکہ کسی اور شہری کے زخمی یا جاں بحق ہونے کی اطلاع نہیں ملی۔ آر پی او نے واقعہ کی مکمل تحقیقات کا حکم دیتے ہوئے متعلقہ افسران سے تفصیلی رپورٹ طلب کر لی ہے اور ذمہ داروں کے تعین کی ہدایت جاری کی ہے۔ پولیس نے جائے وقوعہ سے شواہد اکٹھے کرنا شروع کر دیئے ہیں۔ واقعہ کے بعد علاقے میں سکیورٹی ہائی الرٹ کر دی گئی ہے اور حساس مقامات پر پولیس کی اضافی نفری تعینات کر دی گئی ہے تاکہ امن و امان کی صورتحال کو برقرار رکھا جا سکے۔
