پاکستان کا ثقافتی ورثہ کثیر الجہتی تہذیب و تمدن سے مزین ہے ، وزیراعظم کا عالمی یوم ثقافتی ورثہ پر پیغام

اسلام آباد( نمائندہ خصوصی):وزیر اعظم محمد شہباز شریف نے ثقافتی ورثے کو سماجی تنوع اور ماضی کا امین قرار دیتے ہوئے کہا ہے کہ پاکستان کا ثقافتی ورثہ کثیر الجہتی تہذیب و تمدن سے مزین ہے اور پاکستان دنیا کی قدیم ترین تہذیبوں کے رنگ اپنے اندر سموئے ہوئے ہے۔ آج ہفتہ کو منایا جانے والے عالمی یوم ثقافتی ورثہ کی مناسبت سے اپنے پیغام میں وزیر اعظم نے کہا کہ پاکستان آج اقوام عالم کے ساتھ ہم آواز ہو کر ثقافتی ورثہ کے عالمی دن کو پر عزم انداز میں منا رہا ہے۔ وزیر اعظم آفس کے میڈیا ونگ کی طرف سے جاری بیان کے مطابق وزیر اعظم نے کہا کہ وہ آج پاکستان اور دنیا بھر میں ایسے افراد کو دلی طور پر خراج تحسین پیش کرتے ہیں جو مشترکہ ثقافتی ورثے جیسے قیمتی اثاثے کے تحفظ کے لیے کوشاں ہیں۔ انہوں نے کہا کہ عالمی سطح پر ثقافتی ورثہ کے لیے دن مختص کرنا اسکی اہمیت کو اجاگر کرتا ہے۔ ثقافتی ورثہ سماجی تنوع اور اسکے ماضی کا امین ہے حال کی عکاسی کرتا ہے اور مستقبل کا ضامن ہے۔ انہوں نے کہا کہ پاکستان کا ثقافتی ورثہ کثیر الجہتی تہذیب و تمدن سے مزین ہے۔ سرزمین پاک دنیا کی قدیم ترین تہذیبوں کے رنگ اپنے اندر سموئے ہوئے ہے۔ ہمارا ورثہ انسانی تخلیقی صلاحیت اور تنوع کی خوبصورت مثال ہے۔ ہمارا بیش قیمت ثقافتی ورثہ ہمارا قومی تشخص ہے اور معاشرتی ہم آہنگی کا مظہر ہے۔ ثقافتی قصے کہانیاں ، زبانی روایات، موسیقی، دستکاری اور علاقائی زبانیں معاشرے کی زندہ دلی اور روح کی تازگی کو برقرار رکھتی ہیں۔ورثہ مقامی علم کا محافظ اور تیزی سے بدلتی دنیا میں یہ روایات تسلسل کی علامت ہیں۔ وزیر اعظم نے کہا کہ حکومت پاکستان ثقافتی ورثے کو قومی ترقی اور عالمی تعلقات میں اہم سمجھتی ہے۔ توجہ طلب ثقافتی ورثہ کی یونیسکو کی حفاظتی فہرست میں شمولیت کے لیے بھی کاوشیں جاری ہیں۔ انہوں نے کہا کہ حکومت ورثے کو دستاویزی شکل میں محفوظ بنانے کے لیے ڈیجیٹل ثقافتی پلیٹ فارمز کے قیام میں بھی سرمایہ کاری کر رہی ہے۔ یہ پلیٹ فارمز روایات کو محفوظ رکھیں گے اور انہیں عالمی سطح پر ثقافتی سفارتکاری، سیاحت کی ترقی اور نوجوان نسل کے ساتھ تعلقات کو بھی فروغ دیں گے۔انہوں نے کہا کہ ثقافتی ورثہ کو ماحولیاتی تبدیلی اور روایتی علم کی کمی جیسے متعدد چیلنجز کا سامنا ہے۔حکومت، کمیونٹیز، علمی ادارے اور سول سوسائٹی کی اجتماعی کوششوں سے اسکی نئی نسلوں تک باحفاظت منتقلی کو یقینی بنایا جا سکتا ہے۔انہوں نے کہا کہ آج اہم دن پر وہ تمام پاکستانیوں، بالخصوص نوجوان نسل سے اپیل کرتے ہیں کہ اپنے ثقافتی ورثے پر فخر کریں اور اس کے تحفظ اور فروغ میں فعال کردار ادا کریں۔ ہمارا ورثہ ہماری قومی شناخت اور اتحاد کا ذریعہ ہےآئیے سب مل کرقومی انمول میراث کو محفوظ بنائیں۔