خیبر میڈیکل کالج میں ‘قوتِ نسواں بوٹ کیمپ’: 200 سے زائد طالبات اور لیڈی ڈاکٹرز کی شرکت

اسلام آباد۔( نمائندہ خصوصی):پاکستان مارشل آرٹس ایسوسی ایشن کے زیر اہتمام پشاور میں ‘قوتِ نسواں بوٹ کیمپ’ کاانعقاد کیا گیاجو مارشل آرٹس اور ہنگامی حالات میں دفاع کی تربیت کے ذریعے خواتین کو بااختیار بنانے اور ان کی ذاتی حفاظت کو یقینی بنانے کی جانب ایک اہم سنگ میل ہے۔اس تاریخی مہم کا انعقاد پاکستان مارشل آرٹس ایسوسی ایشن اور IFMSA-Pakistan کےاشتراک سے خیبر میڈیکل کالج میں کیا گیاجس میں خیبرپختونخوا کے مختلف طبی اداروں سے تعلق رکھنے والی طالبات اور پیشہ ور خواتین نے بھرپور شرکت کی۔ دو روزہ بوٹ کیمپ میں 200 سے زائد خواتین شریک ہوئیں، جن میں خیبر میڈیکل کالج، خیبر گرلز میڈیکل کالج، رحمان میڈیکل کالج، نارتھ ویسٹ سکول آف میڈیسن، کبیر میڈیکل کالج، جناح میڈیکل کالج، گجو خان میڈیکل کالج صوابی اور پاک انٹرنیشنل میڈیکل کالج کی طالبات شامل تھیں۔‘فی میل فزیشنز سوسائٹی پاکستان’ سے وابستہ لیڈی ڈاکٹرز نے بھی اس کیمپ میں شرکت کی جو طبی برادری میں تحفظ اور خود اعتمادی کے فروغ کے عزم کی عکاسی کرتا ہے۔یہ اقدام IFMSA-Pakistan کے صدر محمد زید کے اس وژن کا حصہ ہے جس کے تحت پاکستان مارشل آرٹس ایسوسی ایشن کے تعاون سے 2028 تک 10,000 میڈیکل طلبہ اور پیشہ ور افراد کو تربیت فراہم کی جائے گی۔ اسی سلسلے میں اگلے ماہ لاہور میں ایک بڑی تربیتی تقریب منعقد کی جائے گی جس میں 500 کے قریب شرکاء کی آمد متوقع ہے۔تربیتی سیشنز کی قیادت چیف ٹرینر سینسائی انوار محی الدین نے کی، جنہیں سینئر انسٹرکٹرز چوہدری حنظلہ، سمیہ محی الدین، ماہین شعیب اور حوریہ فیصل کی معاونت حاصل تھی۔اس جامع پروگرام میں نہ صرف جسمانی دفاع کی تکنیکیں سکھائی گئیں بلکہ نفسیاتی آمادگی پر بھی توجہ دی گئی تاکہ شرکاء کسی بھی ناگہانی حملے، اسلحہ کے ساتھ حملے، اغوا کی کوشش اور عوامی ٹرانسپورٹ میں درپیش غیر محفوظ حالات کا مقابلہ کر سکیں۔ تقریب کے تنظیمی امور IFMSA-KMC کے لوکل کمیٹی صدر محمد حسان اور لارا کی نمائندہ حدیقہ سلیم کی نگرانی میں انجام دیے گئے۔ شرکاء نے روزانہ چھ گھنٹے کی سخت تربیت حاصل کی اور اس دوران غیر معمولی جوش و خروش کا مظاہرہ کیا۔اس موقع پر فی میل فزیشنز سوسائٹی پاکستان کی صدر پروفیسر ڈاکٹر علینہ بادشاہ نے بوٹ کیمپ کو ایک تاریخی کامیابی قرار دیتے ہوئے شرکاء کے جذبے اور منتظمین کی کاوشوں کو سراہا۔انہوں نے کہا کہ مختلف اداروں کی طالبات کو ایک پلیٹ فارم پر اکٹھا کرنا خوش آئند ہے۔اختتامی تقریب میں ‘شن کیو کوشن کراٹے’ کی معروف شخصیت محمد زکریا خان نے بطور مہمانِ خصوصی شرکت کی اور شرکاء میں اسناد اور تمغے تقسیم کیے۔ نمایاں کارکردگی دکھانے والی خواتین کو ان کی مہارت اور نظم و ضبط کے اعتراف میں گولڈ میڈلز سے نوازا گیا۔ تقریب میں ‘دہ حوا لور’ کی ممبران نے بھی شرکت کی، جس سے خواتین کے اتحاد اور بااختیار ہونے کے مقصد کو مزید تقویت ملی۔