دنیا ایک تباہ کن تصادم کے دہانے سے واپس آ گئی ہے،حالیہ صورتحال ایسی تھی کہ “انسانیت خطرناک حد تک تباہی کے قریب پہنچ چکی تھی،سینیٹر شیری رحمٰن

اسلام آباد( نمائندہ خصوصی)پاکستان پیپلز پارٹی (پی پی پی) کی مرکزی رہنما سینیٹر شیری رحمٰن نے کہا ہے کہ دنیا ایک تباہ کن تصادم کے دہانے سے واپس  گئی ہے، اور حالیہ صورتحال ایسی تھی کہ “انسانیت خطرناک حد تک تباہی کے قریب پہنچ چکی تھی۔بدھ کو ایوان بالا کے اجلاس میں سینیٹ میں خطے کی موجودہ صورتحال پر بحث کے دوران اظہار خیال کرتے ہوئے انہوں نے کہا کہ دنیا ایک بڑے بحران کے کنارے تک پہنچ گئی تھی، اور اگر حالات قابو میں نہ آتے تو اس کے اثرات نہ صرف خطے بلکہ پوری دنیا کے لیے انتہائی سنگین ہو سکتے تھے۔انہوں نے کہا کہ عالمی کشیدگی خطرناک حد تک بڑھ چکی تھی، اور اس کے اثرات صرف مسلم ممالک ہی نہیں بلکہ پوری دنیا پر مرتب ہو سکتے تھے۔شیری رحمٰن نے پاکستان کی قیادت اور سفارتی کوششوں کو سراہتے ہوئے کہا کہ ملک نے کشیدگی کم کرنے میں مثبت کردار ادا کیا۔ انہوں نے ایران اور امریکہ سمیت عالمی برادری کی کاوشوں کو بھی سراہا جن کے نتیجے میں جنگ بندی اور مذاکرات کی راہ ہموار ہوئی۔انہوں نے اس بات پر زور دیا کہ دیرپا امن کے لیے مسلسل سفارتی رابطے ناگزیر ہیں۔ان کا کہنا تھا کہ کسی بھی قسم کی مزید کشیدگی ناقابلِ تصور نتائج کا باعث بن سکتی تھی، جس سے معیشت، ترقی اور انسانی سلامتی بری طرح متاثر ہوتی۔شیری رحمٰن نے کہا کہ دنیا کو اجتماعی طور پر امن کے قیام کے لیے کردار ادا کرنا ہوگا کیونکہ کوئی بھی ملک ایک اور بڑے تصادم کا متحمل نہیں ہو سکتا۔انہوں نے کہا کہ پاکستان ایک ذمہ دار ریاست کے طور پر سامنے آیا ہے جو مکالمے اور استحکام کی حمایت کرتا ہے، اور تمام ممالک پر زور دیا کہ وہ نازک امن کو برقرار رکھنے کے لیے اپنی ذمہ داریاں ادا کریں۔انہوں نے مزید کہا کہ آنے والے دن انتہائی اہم ہوں گے، جو اس بات کا تعین کریں گے کہ آیا جنگ بندی کو ایک پائیدار اور دیرپا امن میں تبدیل کیا جا سکتا ہے یا نہیں۔