اسلام آباد( نمائندہ خصوصی):ترکیہ کے صدر رجب طیب اردوان نے خطے میں کشیدگی کے خاتمے کے لیے پاکستان کے تاریخی امن اقدام پر دلی مبارکباد دیتے ہوئے امن و استحکام کی بحالی کے لیے وزیر اعظم شہباز شریف کی انتھک اور مخلصانہ کوششوں کی ترکیہ کی جانب سے مکمل حمایت کا اعادہ کیا ہے۔ وزیر اعظم آفس کے میڈیا ونگ کی طرف سے بدھ کو جاری بیان کے 
مطابق وزیر اعظم محمد شہباز شریف کو جمہوریہ ترکیہ کے صدر رجب طیب اردوان نے ٹیلی فون کیا۔ترک صدر نے خطے میں کشیدگی کے خاتمے کے لیے پاکستان کے تاریخی امن اقدام پر وزیراعظم کو دلی مبارکباد دیتے ہوئے خلیج میں تباہ کن تنازعہ کو ختم کرنے کی کوششوں پر عمل پیرا ہونے میں وزیر اعظم کی جرات مندانہ اور سمجھدار قیادت کی تعریف کی، جس کی وجہ سے بے پناہ انسانی مصائب اور بنیادی ڈھانچے کی وسیع پیمانے پر تباہی ہوئی ہے۔ انہوں نے خطے میں امن و استحکام کی بحالی کے لیے وزیر اعظم شہباز شریف کی انتھک اور مخلصانہ کوششوں کے لیے ترکیہ کی جانب سے مکمل حمایت کا اعادہ کیا۔وزیراعظم نے پاکستان کی امن کی مخلصانہ کوششوں کی حوصلہ افزائی اور توثیق پر ترک صدر کا تہہ دل سے شکریہ ادا کیا۔ انہوں نے خطے اور عالمی امن و استحکام کے لیے پاکستان کے عزم کا اعادہ کیا۔
ترکیہ کے صدر رجب طیب اردوان کی خطے میں کشیدگی کے خاتمے کے لیے پاکستان کے تاریخی امن اقدام پر دلی مبارکباد
