وزیراعظم محمد شہباز شریف کا جنگ بندی اور پرامن سفارتی کوششوں کے ذریعے تنازعہ کے حل میں پیشرفت پر چین، سعودی عرب ،ترکیہ ، مصر اور قطر سمیت برادر ممالک سے اظہار تشکر

اسلام آباد( نمائندہ خصوصی):وزیراعظم محمد شہباز شریف نے چین، سعودی عرب ،ترکیہ ، مصر اور قطر سمیت برادر ممالک کا شکریہ ادا کیا ہے جنہوں نے جنگ بندی اور پرامن سفارتی کوششوں کے ذریعے تنازعہ کے حتمی حل کی جانب بڑھنے کے سلسلہ میں بے مثال اور بھرپور تعاون کیا۔بدھ کو سماجی رابطہ کی ویب سائٹ ایکس پر اپنے پیغام میں وزیراعظم نے کہا کہ ’’اسلام آباد مذاکرات ‘‘کی جانب پیشرفت کرتے ہوئے میں برادر ممالک عوامی جمہوریہ چین، مملکتِ سعودی عرب، جمہوریہ ترکیہ، عرب جمہوریہ مصر اور ریاستِ قطر کا تہہ دل سے اور مخلصانہ شکریہ ادا کرنا چاہتا ہوں کہ انہوں نے جنگ بندی کے حصول اور پُرامن سفارتی کوششوں کو ایک جامع اور حتمی حل کی جانب بڑھنے کا موقع دینے کے لئے بے مثال اور بھرپور تعاون فراہم کیا۔وزیراعظم نے کہا کہ وہ خلیج تعاون کونسل کے برادر ممالک کا بھی شکریہ ادا کرنا چاہتے ہیں جس کی مسلسل حمایت اور خطے میں امن و استحکام کے لئے وابستگی ہماری کوششوں کے لیے نہایت اہم اور بنیادی حیثیت رکھتی ہے۔انہوں نے کہا کہ ہمارے تمام برادر ممالک اور ریاست ہائے متحدہ امریکہ کی قیادت نے امن کو ایک موقع دینے کے لئے غیر معمولی دور اندیشی، حکمت اور صبر کا مظاہرہ کیا۔انہوں نے کہا کہ وہ دنیا بھر میں اپنے تمام شراکت داروں اور دوستوں کا بھی شکریہ ادا کرتے ہیں جنہوں نے پاکستان کی عالمی امن کے لئے مخلصانہ کوششوں کو سراہا اور ان کا اعتراف کیا۔ انہوں نے کہا کہ آئیے ہم سب مل کر خطے اور اس سے آگے ایک پائیدار اور دیرپا امن کے قیام کے لئے کام کریں!