ٹرمپ سے مہلت میں دو ہفتوں کی توسیع ، ایران سے دو ہفتوں کیلئے آبنائے ہرمز کھولنے اور تمام متحارب فریقوں سے دو ہفتوں کی جنگ بندی کی درخواست کی ہے ،وزیر اعظم محمد شہباز شریف

اسلام آباد۔( نمائندہ خصوصی)وزیر اعظم محمد شہباز شریف نے مشرق وسطیٰ میں جنگ کے خاتمے اور امن کیلئے سفارتی کوششوں کے بار آور ہونے کی امید ظاہر کرتے ہوئے امریکی صدر ٹرمپ سے مہلت میں دو ہفتوں کی توسیع ، ایران سے دو ہفتوں کیلئے آبنائے ہرمز کھولنے اور تمام متحارب فریقوں سے دو ہفتوں کی جنگ بندی کی درخواست کی ہے ۔ بدھ کی شب ایکس پر اپنے پیغام میں وزیر اعظم محمد شہباز شریف نے کہا کہ مشرقِ وسطیٰ میں جاری جنگ کے پرامن حل کے لیے کی جانے والی سفارتی کوششیں بتدریج، مضبوط اور مؤثر انداز میں آگے بڑھ رہی ہیں، اور ان کے جلد ٹھوس نتائج تک پہنچنے کے امکانات موجود ہیں۔وزیر اعظم نے کہا کہ سفارت کاری کی کامیابی کیلئے وہ امریکی صدر ٹرمپ سے خلوص سے درخواست کرتے ہیں کہ وہ مہلت میں دو ہفتوں کی توسیع کریں۔ انہوں نے کہا کہ پاکستان پوری سنجیدگی اور اخلاص کے ساتھ ایرانی بھائیوں سے بھی درخواست کرتا ہے کہ وہ خیرسگالی کے جذبے کے تحت آبنائے ہرمز کو دو ہفتوں کے لیے کھول دیں۔ ہم تمام متحارب فریقوں پر بھی زور دیتے ہیں کہ وہ ہر جگہ دو ہفتوں کے لیے جنگ بندی کریں تاکہ سفارتی کوششوں کو جنگ کے حتمی خاتمے تک پہنچنے کا موقع مل سکے، جو خطے میں دیرپا امن اور استحکام کے مفاد میں ہے۔