نئی دہلی( نمائندہ خصوصی):پاکستان نے بیساکھی میلے میں شرکت کے لئے بھارت کے 2800 سے زائد یاتریوں کو ویزے جاری کر دیئے ہیں۔ یاتری 10 سے 19 اپریل 2026 تک پاکستان میں منعقد ہونے والی سالانہ تقریبات میں شرکت کریں گے اور اپنے دورے کے 
دوران یاتری مختلف مقدس مقامات کی زیارت کریں گے جن میں گوردوارہ پنجہ صاحب، گوردوارہ ننکانہ صاحب اور گوردوارہ کرتارپور صاحب شامل ہیں۔اس خوشی کے موقع پر ناظم الامور سعد احمد وڑائچ نے یاتریوں کو دلی مبارکباد پیش کی۔ انہوں نے 
کہا کہ یہ دورہ پاکستان کے بین المذاہب اور بین الثقافتی ہم آہنگی کے فروغ کے عزم کی عکاسی کرتا ہے۔ انہوں نے مزید کہا کہ مختلف مذہبی ورثے کے مقامات کے ایک باوقار امین کے طور پر پاکستان رواداری، خیر سگالی اور باہمی احترام کے عالمی اصولوں کے فروغ کے لئے اپنا کردار جاری رکھے گا۔
