وفاقی وزیر اطلاعات عطاء اللہ تارڑ کی سینئر صحافی رضوان الرحمان کی والدہ کے انتقال پر تعزیت کیلئے ان کے گھر آمد، فاتحہ خوانی کی

لاہور ( نمائندہ خصوصی)وفاقی وزیر اطلاعات و نشریات عطاء اللہ تارڑ ہفتہ کو یہاں سینئر صحافی رضوان الرحمان (رضوان رضی) کی والدہ کے انتقال پر تعزیت کے لئے ان کے گھر گئے۔ وفاقی وزیر اطلاعات نے اہل خانہ سے دلی تعزیت اور ہمدردی کا اظہار کیا اور مرحومہ کے ایصال ثواب کے لئے فاتحہ خوانی کی۔اس موقع پر گفتگو کرتے ہوئے وفاقی وزیر اطلاعات نے کہا کہ رضوان رضی کی والدہ کے انتقال کی خبر سن کر دلی افسوس ہوا، ماں جیسی عظیم ہستی کا انتقال بڑا سانحہ ہے، والدہ کے انتقال سے پیدا ہونے والا خلا کبھی پر نہیں ہو سکتا، دکھ کی اس گھڑی میں رضوان رضی اور ان کے خاندان کے غم میں برابر کے شریک ہیں۔انہوں نے دعا کی کہ اللہ تعالیٰ مرحومہ کو اپنے جوار رحمت میں اعلیٰ مقام اور لواحقین کو صبر جمیل عطا فرمائے۔ وزیراعظم کے میڈیا کوآرڈینیٹر بدر شہباز وڑائچ بھی وفاقی وزیر اطلاعات کے ہمراہ تھے۔