وزیراعلیٰ سندھ سے وفاقی محتسب اعلیٰ کی ملاقات ،باہمی دلچسپی کے امور بار ے تبادلہ خیال کیا

کراچی۔( نمائندہ خصوصی):وزیراعلیٰ سندھ سید مراد علی شاہ سے وفاقی محتسب اعلیٰ نوید کامران بلوچ نے ملاقات کی جس دوران باہمی دلچسپی کے امور بار ے تبادلہ خیال کیا گیا ۔جمعے کو سی ایم ہائوس سے جاری اعلامیہ کے مطابق وزیراعلیٰ نے نوید کامران کو وفاقی محتسب اعلیٰ کا منصب سنبھالنے پر مبارک باد دی جبکہ نوید کامران نے حلف برداری تقریب میں شرکت پر وزیراعلیٰ کا شکریہ ادا کیا۔سید مراد علی شاہ نے کہا کہ نوید کامران تجربہ کار افسرہیں،وہ سندھ میں مزید ریجنل اور سب ریجنل دفاتر قائم کریں،صوبائی حکومت بھرپور تعاون کرے گی۔ نوید کامران بلوچ نے کہا کہ محتسب اعلیٰ کا ادارہ 660 مختلف وفاقی اداروں اور ذیلی اداروں کے خلاف عوامی شکایات کا ازالہ اور 60 یوم میں انصاف فراہم کرتا ہے۔انہوں نے کہا کہ وفاقی محتسب کا ادارہ مفت انصاف کی فراہمی میں عوام کی بہترین رہنمائی کرتا ہے۔ وزیر اعلیٰ نے کہا کہ سندھ حکومت وفاقی محتسب کے پورٹل کو اپنے حکومتی پورٹل کے ساتھ منسلک کرے گی،وفاقی محتسب کے سندھ کے پورٹل سے منسلک ہونے سے عوام کو آگاہی حاصل ہوگی۔