کراچی۔ ( نمائندہ خصوصی):وزیراعلی سندھ سید مراد علی شاہ نے عالمی یومِ مادری زبان کے موقع پر اپنے پیغام میں کہا ہے کہ مادری زبان ہماری شناخت، ثقافت اور تہذیبی ورثے کی بنیاد ہے۔ ہفتہ کو وزیر اعلی ہائوس سے جاری اعلامیہ کے مطابق انہوں نے کہا کہ ہر بچے کو اپنی مادری زبان میں تعلیم اور اظہار کا حق حاصل ہے۔انہوں نے کہا کہ نوجوان لسانی تنوع کے وارث 
ہی نہیں بلکہ اس کے مستقبل کے معمار بھی ہیں۔وزیراعلی سندھ نے کہا کہ کثیر لسانی تعلیم شمولیت، مساوات اور پائیدار ترقی کیلئے ناگزیر ہے۔انہوں نے کہا کہ ڈیجیٹل دور میں مادری زبانوں کی نمائندگی کو یقینی بنانا وقت کی اہم ضرورت ہے۔انہوں نے مزید کہا کہ چھوٹی زبانوں کو بھی مصنوعی ذہانت اور آن لائن پلیٹ فارمز میں یکساں مواقع فراہم کیے جانے چاہئیں۔وزیر اعلی سندھ نے کہا کہ لسانی تنوع سماجی ہم آہنگی، امن اور باہمی احترام کو فروغ دیتا ہے۔ حکومت سندھ صوبے کی تمام زبانوں کے تحفظ، ترویج اور تدریس کیلئے پرعزم ہے۔ آئیے عہد کریں کہ ہم اپنی مادری زبانوں کو آئندہ نسلوں تک منتقل کریں گے اور ان کی قدراور وقار کو برقرار رکھیں گے۔
