حکومت ڈیجیٹل پاکستان کے وژن کے تحت میڈیا اور آئی ٹی کے شعبوں میں جدت کو فروغ دے رہی ہے، وزیراعظم شہباز شریف کا عالمی یوم ریڈیو کے موقع پر پیغام

اسلام آباد۔( نمائندہ خصوصی):وزیراعظم محمد شہباز شریف نے کہاہے کہ حکومت ڈیجیٹل پاکستان کے وژن کے تحت میڈیا اور آئی ٹی کے شعبوں میں جدت کو فروغ دے رہی ہے،سب مل کر عہد کریں کہ ریڈیو سمیت تمام پاکستانی میڈیا کو جدید تقاضوں سے ہم آہنگ کرتے ہوئے اسے سچائی، ذمہ داری اور قومی یکجہتی کا مضبوط ذریعہ بنائیں گے۔انہوں نے ان خیالات کا اظہارجمعہ کووزیر اعظم آفس کے میڈیا ونگ سے عالمی یومِ ریڈیو پر جاری پیغام میں کیا ۔وزیر اعظم نے کہا کہ آج ہم عالمی برادری کے ساتھ مل کر “عالمی یوم ریڈیو” منا رہے ہیں، قیام پاکستان کے بعد ریڈیو پاکستان ہی ایک ایسا طاقتور ذریعہ ابلاغ رہا ہے جس نے قوم کو جوڑا، شعور بیدار کیا اور معلومات کی فراہمی کو عام کیا۔انہوں نے کہا کہ پاکستان میں ریڈیو کی تاریخ کئی حوالوں سے نہایت روشن ہے جن میں سے سب سے اہم اس ادارے کا ملکی زرعی ترقی ، ماحولیاتی شعور، ثقافتی فروغ اور عوامی آگاہی میں کلیدی کردار ادا کرنا ہے۔انہوں نے کہا کہ آج جب دنیا تیزی سے ڈیجیٹل دور میں داخل ہو رہی ہے، ریڈیو بھی جدید تقاضوں سے ہم آہنگ ہو رہا ہے۔اس سال عالمی ریڈیو ڈے کا مرکزی موضوع “ ریڈیو اور مصنوعی ذہانت “ ہے، جو اس بات کی عکاسی کرتا ہے کہ ٹیکنالوجی اور انسانی تخلیقی صلاحیت کے امتزاج سے ابلاغ کا نظام مزید مؤثر اور جامع بنایا جا سکتا ہے۔وزیر اعظم نے کہا کہ پاکستان بھی اس جدید ٹیکنالوجی کو اپنانے کے لیے عملی اقدامات کر رہا ہے تاکہ نوجوان نسل کو جدید مہارتوں سے آراستہ کیا جا سکے اور میڈیا کے شعبے کو عالمی معیار سے ہم آہنگ کیا جا سکے۔ اس موقع پر ہم اس عزم کا اعادہ کرتے ہیں کہ ریڈیو پاکستان کو جدید ٹیکنالوجی، خصوصاً مصنوعی ذہانت کے ساتھ مربوط کر کے اسے عوامی خدمت، تعلیم، صحت اور قومی ترقی کا مؤثر ذریعہ بنائیں گے۔وزیراعظم نے کہا کہ حکومت ڈیجیٹل پاکستان کے وژن کے تحت میڈیا اور آئی ٹی کے شعبوں میں جدت کو فروغ دے رہی ہے تاکہ پاکستان علم اور ٹیکنالوجی کے شعبوں میں نمایاں مقام حاصل کر سکے،آئیے، ہم سب مل کر عہد کریں کہ ہم ریڈیو پاکستان سمیت تمام پاکستانی میڈیا کو جدید تقاضوں سے ہم آہنگ کرتے ہوئے اسے سچائی، ذمہ داری اور قومی یکجہتی کا مضبوط ذریعہ بنائیں گے۔