اسلام آباد۔( نمائندہ خصوصی):پاکستان اور چین 2026 میں سفارتی تعلقات کے قیام کے 75 سال مکمل ہونے کا جشن منانے کی تیاری کر رہے ہیں جس کے پیش نظر وفاقی حکومت نے اس اہم سنگِ میل کی یاد میں سال بھر 72 سرگرمیوں کے انعقاد کا منصوبہ بنایا ہے، ان اقدامات کا مقصد دوطرفہ تعلقات کی بھرپور تاریخ کو خراجِ تحسین پیش کرنا اور مستقبل میں دونوں 
ممالک کے درمیان تعاون کے نئے مواقع ہموار کرنا ہے۔ویلتھ پاکستان کو دستیاب دستاویزات کے مطابق وفاقی حکومت نے سالگرہ کی تقریبات کی منصوبہ بندی کے لیے ایک خصوصی کمیٹی قائم کی ہے جس نے اس موقعے کی مناسبت سے 72 سرگرمیوں کی فہرست تیار کی ہے جن میں یادگاری سکہ اور ڈاک ٹکٹ کا اجرا بھی شامل ہے جو پاکستان اور چین کے گہرے اور دیرینہ تعلقات کی علامت ہوں گے۔تقریبات میں تجارت، ثقافتی تبادلے اور تکنیکی ترقی سمیت مختلف شعبوں کا احاطہ کیا جائے گا جس کے ذریعے گزشتہ 75 برسوں میں پروان چڑھنے والی کثیر جہتی شراکت داری کو اجاگر کیا جائے گا۔اس کے علاوہ پاکستان اور چین کے درمیان دو درجن سے زائد مشترکہ سرگرمیوں کی بھی فعال منصوبہ بندی کی جا رہی ہے۔یہ پروگرام سال بھر منعقد ہوں گے اور دونوں ممالک باہمی تعاون سے انہیں عملی جامہ پہنائیں گے۔یہ امر قابلِ ذکر ہے کہ نائب وزیرِاعظم و وزیرِ خارجہ اسحاق ڈار 
ساتویں وزرائے خارجہ سٹریٹجک ڈائیلاگ کے لیے چین کا دورہ کرنے والے پہلی غیر ملکی معزز شخصیت تھے جس سے دونوں ممالک کے درمیان سفارتی روابط مزید مضبوط ہوئے۔ دورے کے دوران نائب وزیرِاعظم و وزیرِ خارجہ اسحاق ڈار اور چینی وزیرِ خارجہ وانگ یی نے سفارتی تعلقات کی 75ویں سالگرہ کے حوالے سے ایک خصوصی لوگو کا مشترکہ طور پر اجرا بھی کیا۔ یہ لوگو پاکستان اور چین کے دیرپا اشتراک کی علامت ہے اور دوطرفہ تعاون کو مزید گہرا کرنے کے مشترکہ عزم کی عکاسی کرتا ہے۔
پاکستان اور چین کے سفارتی تعلقات کی 75ویں سالگرہ ، حکومت کا 72 سرگرمیوں کے انعقاد کا منصوبہ
