صدر ورلڈ بینک کا سندھ پیپلز ہاؤسنگ فار فلڈ ایفیکٹیز پروگرام کے تحت تعمیر شدہ گھروں کا دورہ ،منصوبے پر اطمینان کا اظہار کیا

لاڑکانہ۔( نمائندہ خصوصی)وزیراعلیٰ سندھ سید مراد علی شاہ اور ورلڈ بینک گروپ کے صدراجے بنگا نے تحصیل ڈوکری کے گاؤں بہاول جت میں سندھ پیپلز ہاؤسنگ فار فلڈ ایفیکٹیز (SPHF) پروگرام کے تحت تعمیر شدہ گھروں کا دورہ کیا ۔ ورلڈ بینک کے صدر نے منصوبے پر اطمینان کا اظہار کیا۔ اس موقع پر وزیراعلیٰ سندھ نے کہا ہے کہ سندھ حکومت اور ورلڈ بینک کے تعاون سے بہاول جت میں سیلاب سے متاثرہ 145 گھروں کی تعمیر نو کی گئی ہے، جن میں سے 83 فیصد گھروں کے مالکانہ حقوق خواتین کو دیئے گئے ہیں۔انہوں نے کہا کہ سندھ میں خواتین کو بااختیار بنایا جا رہا ہے اور سماجی شمولیت میں نمایاں اضافہ ہو رہا ہے۔مراد علی شاہ نے کہا کہ سیلاب متاثرین کے لیے 21 لاکھ گھروں کی تعمیر سندھ حکومت اور ورلڈ بینک کا ایک تاریخی اقدام ہے اور سندھ میں دنیا کی سب سے بڑی بحالی کی کوششوں میں سے ایک جاری ہے۔ انہوں نے مزید کہا کہ یہ پروگرام ہنگامی ردعمل سے ایک جامع بحالی ماڈل میں تبدیل ہو چکا ہےجس میں کمیونٹیز کو اپنی زندگیوں کی تعمیر نو کے لیے بااختیار بنایا جا رہا ہے۔اس موقع پر ورلڈ بینک کے صدر اجے بنگا نے کہا کہ یہ کمیونٹی قیادت میں اپنی نوعیت کا دنیا کا سب سے بڑا ہاؤسنگ پروگرام ہے، جس کے تحت ہر خاندان خود اپنا گھر تعمیر کرتا ہے، آمدن کمیونٹی میں برقرار رہتی ہے اور مقامی مزدوروں کو روزگار ملتا ہے۔انہوں نے بتایا کہ ورلڈ بینک نے اس پروگرام کے لئے مجموعی طور پر 950 ملین ڈالر کی مالی معاونت فراہم کی ہے۔اجے بنگا نے کہا کہ پروگرام کا مرکز غریب ترین گھرانے ہیں، جنہیں تقریباً 1400 ڈالر مالیت کے وسائل فراہم کیے جاتے ہیں جبکہ ہر خاندان کو رسمی بینکنگ سہولیات تک رسائی بھی حاصل ہوئی ہے۔ انہوں نے خواتین کو مالکانہ حقوق ملنے کو آزادی کی علامت قرار دیا۔دورے کے دوران ورلڈ بینک کے صدر نے مقامی افراد، خصوصاً خواتین سے ملاقات کی، کمیونٹی سینٹر میں ہاتھ کے ہنر سے بنی اشیا کا مشاہدہ کیا اور امرود کا پودا بھی لگایا۔ تقریب کے اختتام پر وزیراعلیٰ سندھ اور صدر ورلڈ بینک ر نے خواتین میں مالکانہ حقوق کی اسناد بھی تقسیم کیں۔