چیئرپرسن بی آئی ایس پی سینیٹر روبینہ خالد کا بینظیر بھٹو شہید ہیومن ریسورس ریسرچ اینڈ ڈویلپمنٹ بورڈ کا دورہ

کراچی ( نمائندہ خصوصی)چیئرپرسن بینظیر انکم سپورٹ پروگرام سینیٹر روبینہ خالد نے کراچی میں بینظیر بھٹو شہید ہیومن ریسورس ریسرچ اینڈ ڈویلپمنٹ بورڈ (بی بی ایس ایچ آر ڈی) کا دورہ کیا۔ ان کی آمد پر چیئرمین بورڈ تمیز الدین خیرو، سیکرٹری منور علی مٹھانی اور ادارے کے عملے نے ان کا خیرمقدم کیا۔اس دوران چیئرپرسن بی آئی ایس پی کو بی بی ایس ایچ آر ڈی کی جانب سے جاری مختلف اقدامات، منصوبوں اور تربیتی پروگرامز پر تفصیلی بریفنگ دی گئی۔ اجلاس میں بینظیر ہنرمند پروگرام کے تحت مستحق خواتین اور ان کے گھرانوں کے افراد کے لیے مختلف شعبہ جات میں سکل ٹریننگ اور روزگار کے مواقع فراہم کرنے، نیز دونوں اداروں کے درمیان باہمی اشتراک اور تعاون کو مزید فروغ دینے پر تفصیلی تبادلہ خیال کیا گیا۔بریفنگ کے دوران آگاہ کیا گیا کہ سندھ میں بی آئی ایس پی سے مستفید ہونے والے گھرانوں کے افراد کے لیے سکل ٹریننگ کے تحت پانچ ہزار افراد کی رجسٹریشن مکمل کی جا چکی ہے، جبکہ اس سے قبل تین ہزار افراد کا ہدف مقرر کیا گیا تھا۔ ان تربیتی پروگرامز کا بنیادی مقصد مستحق خاندانوں کو ہنر مند بنا کر خود کفیل بنانا اور انہیں باعزت روزگار کے مواقع فراہم کرنا ہے۔اس موقع پر گفتگو کرتے ہوئے چیئرپرسن بی آئی ایس پی سینیٹر روبینہ خالد نے کہا کہ سکل ٹریننگ شہید محترمہ بینظیر بھٹو کا وژن تھا۔ انہوں نے شہید بی بی کے الفاظ کو یاد کرتے ہوئے کہا کہ “ہنر آپ کا سرمایہ ہے”۔ سینیٹر روبینہ خالد نے کہا کہ آج عالمی سطح پر ہنر مند افرادی قوت کی مانگ میں مسلسل اضافہ ہو رہا ہے، جس سے فائدہ اٹھانے کے لیے ہمیں اپنے نوجوانوں اور خواتین کو جدید تقاضوں کے مطابق تربیت فراہم کرنا ہوگی۔انہوں نے کہا کہ حکومت کے پاس وسائل موجود ہیں، تاہم ضرورت اس امر کی ہے کہ تمام ادارے باہمی اشتراک اور آپسی تعاون کے ساتھ مل کر کام کریں تاکہ زیادہ سے زیادہ مستحق افراد کو فائدہ پہنچایا جا سکے۔ چیئرپرسن بی آئی ایس پی نے ہاسپیٹیلٹی، ہیلتھ کیئر اور ریزیڈینشل کورسز جیسے شعبوں پر خصوصی توجہ دینے کی ضرورت پر زور دیا، کیونکہ ان شعبوں میں مقامی اور بین الاقوامی سطح پر روزگار کے وسیع مواقع موجود ہیں۔سینیٹر روبینہ خالد نے کہا کہ یہ ڈیجیٹل میڈیا کا دور ہے اور سکل ٹریننگ کی اہمیت کے حوالے سے عوام میں مکمل آگاہی پیدا کرنا وقت کی اہم ضرورت ہے۔ انہوں نے اس بات پر بھی زور دیا کہ بیرونِ ملک روزگار کے حصول کے لیے بین الاقوامی معیار کی سرٹیفکیشنز نہایت ضروری ہیں، لہٰذا تربیتی پروگرامز میں ان سرٹیفکیشنز کو یقینی بنایا جانا چاہیے۔اجلاس میں ڈائریکٹر جنرل بی آئی ایس پی سندھ ثناءاللہ رند، آؤٹ ریچ کنسلٹنٹ بی آئی ایس پہ نوید خان , اسسٹنٹ ڈائریکٹر میڈیا شفقت علی قریشی اور دیگر متعلقہ افسران نے شرکت کی۔ اجلاس کے اختتام پر شہید محترمہ بینظیر بھٹو کے بلند درجات کے لیے دعا بھی کی گئی۔