سیاح مری کا سفر کرنے سے گریز کریں ۔ عظمی بخاری

لاہور( نمائندہ خصوصی)وزیر اطلاعات و ثقافت پنجاب عظمی بخاری نے مری کا رخ کرنے والے شہریوں سے اپیل کی ہے کہ وہ موجودہ حالات کے پیشِ نظر مری کا سفر کرنے سے گریز کریں۔ انہوں نے کہا کہ مری میں اس وقت سیاحوں کی بہت بڑی تعداد پہلے ہی موجود ہے۔عظمی بخاری نے بتایا کہ مری میں شدید برفباری کا سلسلہ جاری ہے اور شہر میں گنجائش سے کہیں زیادہ گاڑیاں داخل ہو چکی ہیں، جس کے باعث ٹریفک اور شہری سہولیات پر دبا وبڑھ گیا ہے۔ انہوں نے کہا کہ اب مری میں مزید گاڑیوں کے داخلے کی بالکل گنجائش نہیں رہی۔صوبائی وزیر نے واضح کیا کہ شہریوں سے التماس ہے کہ وہ اپنی اور دوسروں کی حفاظت کو مدنظر رکھتے ہوئے مری کا سفر موخرکریں۔عظمی بخاری نے کہا کہ مری میں موجود سیاحوں کی حفاظت حکومتِ پنجاب کی اولین ترجیح ہے اور تمام متعلقہ ادارے الرٹ ہیں، تاہم غیر ضروری سفر سے اجتناب ہی بہترین فیصلہ ہے۔ انہوں نے شہریوں سے اپیل کی کہ وہ ذمہ داری کا مظاہرہ کریں اور موجودہ صورتحال معمول پر آنے تک مری کا رخ نہ کریں۔